O‘zbekistondagi bir nechta tijorat banklari 13-dekabr, dushanba kuni dollar valyutasining so‘mga nisbatan kursini oshirdi.
Aksariyat banklar 1 AQSh dollarini 10 755—10 810 so‘mga sotib olishni, 10 860 so‘mga sotishni taklif qilmoqda. Spot valyuta ayirboshlash uchun eng hamyonbop banklar ro‘yxatini keltirdi.
Unga ko‘ra, dollar eng arzon narxda sotilayotgan banklar “Aloqabank”, “Asia Alliance Bank” va “Trastbank” bo‘lib, 1 dollar uchun 10 830 so‘m etib belgilangan. Eng maqbul xarid narxi esa “Invest Finance Bank”, “Poytaxtbank” va “Kapitalbank” tomonidan 10 810 so‘mga oshirilgan kurs bo‘yicha taklif qilinmoqda.
Eslatib o‘tamiz, 10-dekabr, juma kuni dollar o‘zining maksimal qiymatini yangilagan edi. O‘shanda banklararo kurs 10 850 so‘mgacha ko‘tarilgan.
Markaziy bank ma’lumotlariga ko‘ra, 2021-yilning yanvar—oktabr oylarida so‘m atigi 2 foizga qadrsizlangan. Yillik stavka esa so‘nggi bir necha yil ichida eng past dajarada qolmoqda — hozir u 3 foizni tashkil qiladi.
Qayd etilishicha, 2022-yilda Hisob palatasi dollarning yillik o‘rtacha kursini 11 300 so‘m deb prognoz qilgan.
Dollar kursi noyabr o‘rtalaridan boshlab keskin o‘sishni boshlagan. 29-noyabr kuni 10 830 so‘mga qadar, 30-noyabr kuni 10 840 so‘mga qadar ko‘tarilgandi. Markaziy bank 13-dekabrdan xorijiy valyutalarning o‘zbek so‘miga nisbatan yangi qiymatini belgiladi. Unga ko‘ra, dollarning rasmiy kursi 11,75 so‘mga ko‘tarilib, 10 807,48 so‘mni tashkil qildi.
Izoh (0)