Фарғона вилоятининг аҳоли гавжум жойлари — бозорларнинг кириш қисми ва мактаблар яқинига қуёш батареялари ёрдамида ишлайдиган кўчма светофорлар ўрнатилмоқда. Бу ҳақда «Дарё» мухбири Азизбек Абдувалиев хабар берди.
Мазкур қурилма лойиҳаси Фарғона политехника институти олимлари томонидан ишлаб чиқилган ва вилоятдаги «Олтиариқ-инновация» корхонаси мутахассислари томонидан тайёрланмоқда.
«Олтиариқ туманининг ўзи ‘Инновацион ҳудуд’ деб эълон қилинган. Бу ерда бугунги кунда жами 5,8 миллиард сўмлик 9 та лойиҳа амалга оширилмоқда. Улар орасида йўлларда автомобилларнинг доимий ҳаракатидан узлуксиз электр энергияси олиш, балиқ уни ва биогумус тайёрлаш, чиқиндилардан полистирол ишлаб чиқариш каби истиқболли лойиҳалар бор. ‘Ақлли’ светофор эса шулардан бири. Унинг одатий светофорлардан афзаллик томонлари кўп: электр энергияси талаб қилмайди, пиёдалар ўтиш жойларида фойдаланиш мумкин, бошқаруви автоматлаштирилган, белгиланган манзилга олиб бориш, ўрнатиш ва ишлатиш қулай», — дейди вилоят Инновацион ривожланиш бошқармаси бош мутахассиси Ўктамжон Қодиров.
Ушбу лойиҳа Инновацион ривожланиш вазирлиги томонидан маъқулланди ва уни амалга ошириш учун 618 миллион сўм маблағ ажратилди.
Қайд этиш жоизки, қуёш панели ёрдамида ишлайдиган светофорлар электр энергияси таъминотида узилишлар кузатилаётган ҳозирги шароитда жуда қулай. Қолаверса, давлат томонидан ўрнатиладиган светофорлардан анча арзон. Жумладан, мобил светофор 15 миллион, пиёдалар учун мўлжаллангани 40 миллион, чорраҳаларда қўлланадигани эса 100 миллион сўм атрофида.
Ҳозирда бундай қурилмалардан 40 дан ортиғи вилоятнинг Марғилон, Данғара, Ёзёвон, Фурқат, Қўштепа, Бувайда, Риштон ва Олтиариқ туманларида фойдаланилмоқда. Уларга бошқа вилоятлардан ҳам буюртмалар тушмоқда. Жумладан, бугунги кунгача «ақлли» светофорлар Сурхондарё вилоятининг Олтинсой ва Бухоро вилоятининг Ромитан туманларида ўрнатилди.
Изоҳ (0)