Сурхондарё вилоятининг Денов шаҳрида вилоят ҳокими Тўра Боболов, соғлиқни сақлаш вазирининг биринчи ўринбосари Амрулло Иноятов, Бош прокуратура бошқарма бошлиғи ўринбосари Дониёр Масалиев, Фавқулодда вазиятлар вазирлиги бош бошқарма бошлиғи Ўлмас Музаффаров иштирокидаги матбуот брифингида портлаш юзасидан жиноят иши қўзғатилиб, 10 дан ортиқ экспертизалар тайинлангани хабар берилганди.
«Дарё»да эълон қилинган хабарда Бош прокуратура вакили Дониёр Масалиев жиноят иши Жиноят кодексининг қайси моддаларига асосан қўзғатилганига аниқлик киритилмаганини билдирганди. Бош прокуратура ахборот хизмати раҳбари Ҳаёт Шамсутдинов мазкур хабарга жавобан ҳолатга аниқлик киритди.
Қайд этилишича, Деновдаги савдо мажмуасида юзага келган чақнаш ҳодисаси бўйича Бош прокуратура томонидан Жиноят кодексининг 257-модда (меҳнатни муҳофаза қилиш қоидаларини бузиш) ва 259-моддалари (ёнғин хавфсизлиги қоидаларини бузиш) билан жиноят иши қўзғатилган.
Эслатиб ўтамиз, Деновдаги портлаш юзасидан маълумот берилган брифингда «Indenim» савдо марказида «Indenim» дўкони ва 12 та тадбиркорлик субъекти фаолият юритгани, портлаш содир бўлишидан аввал савдо марказида ҳисоб-китоб ишлари амалга оширилиб, қанча мол-мулк борлиги аниқлангани айтилганди. Мазкур портлашлар ҳақида фикр билдирган маҳаллий аҳоли вакиллари портлаш уюштирилган бўлиши мумкинлигини тахмин қилган бўлса, брифингда сўз олган Бош прокуратура вакили эса дастлабки ўрганишлар портлаш бирор-бир портлатувчи модда ёки нефть маҳсулоти ёрдамида юзага келганини инкор қилаётганини билдирганди.
Эслатиб ўтамиз, Сурхондарёнинг Денов шаҳри марказидаги «Indenim» савдо мажмуасида 7 декабрь тонгида кучли портлаш юз берди. Расмий маълумотларга кўра, портлаш оқибатида камида икки киши ҳалок бўлган, тўққиз киши турли тан жароҳатлари билан шифохонага ётқизилган.
Изоҳ (0)