Самарқанд вилояти Иштихон туманидаги хонадонларнинг биридан номаълум этиологик заҳарланиш билан вафот этган фуқаро жасади топилган. Бу ҳақда туман ҳокимининг мазкур бахтсиз ҳодисани текшириш ва ҳисобга олиш тўғрисида қарорида маълум қилинган.
Қайд этилишича, 19 октябрь куни Иштихон тумани «Намуна» МФЙда яшовчи Ф.А.нинг яшаш хонадонидан бир кишининг жасади топилган. Дастлабки суриштирувда мазкур хонада кўмирнинг чала ёнишидан эҳтиётсизлик билан фойдаланилгани аниқланган.
Суд тиббий экспертизанинг дастлабки маълумотига кўра, ушбу фуқаро номаълум этнологик моддадан заҳарланган деб гумон қилинмоқда.
Шу муносабат билан Иштихон тумани ҳокими содир бўлган бахтсиз ҳодиса сабабларини текшириш бўйича қарор қабул қилган. Қарорда туман масъулларига содир бўлган ҳодиса юзасидан комиссия тузиш ва бахтсиз ҳодиса сабабларини синчковлик билан ўрганиш, зарурат туғилган тақдирда, бахтсиз ҳодиса сабабларини аниқлаш учун экспертлар ёки қўшимча мутахассислар жалб этиш вазифаси юкланган.
Эслатиб ўтамиз, бундан аввал Самарқанд вилояти Паст Дарғом туманидаги корхоналардан бирига ўрнатилган контейнер ичида икки нафар ишчининг жасади номаълум моддадан заҳарланиш аломатлари билан топилганди. Кейинчалик улар ис газидан заҳарланиб, вафот этгани маълум бўлганди.
Изоҳ (0)