Surxondaryo viloyatining Denov shahrida viloyat hokimi To‘ra Bobolov, sog‘liqni saqlash vazirining birinchi o‘rinbosari Amrullo Inoyatov, Bosh prokuratura boshqarma boshlig‘i o‘rinbosari Doniyor Masaliyev, Favqulodda vaziyatlar vazirligi bosh boshqarma boshlig‘i O‘lmas Muzaffarov ishtirokidagi matbuot brifingida portlash yuzasidan jinoyat ishi qo‘zg‘atilib, 10 dan ortiq ekspertizalar tayinlangani xabar berilgandi.
“Daryo”da e’lon qilingan xabarda Bosh prokuratura vakili Doniyor Masaliyev jinoyat ishi Jinoyat kodeksining qaysi moddalariga asosan qo‘zg‘atilganiga aniqlik kiritilmaganini bildirgandi. Bosh prokuratura axborot xizmati rahbari Hayot Shamsutdinov mazkur xabarga javoban holatga aniqlik kiritdi.
Qayd etilishicha, Denovdagi savdo majmuasida yuzaga kelgan chaqnash hodisasi bo‘yicha Bosh prokuratura tomonidan Jinoyat kodeksining 257-modda (mehnatni muhofaza qilish qoidalarini buzish) va 259-moddalari (yong‘in xavfsizligi qoidalarini buzish) bilan jinoyat ishi qo‘zg‘atilgan.
Eslatib o‘tamiz, Denovdagi portlash yuzasidan ma’lumot berilgan brifingda “Indenim” savdo markazida “Indenim” do‘koni va 12 ta tadbirkorlik subyekti faoliyat yuritgani, portlash sodir bo‘lishidan avval savdo markazida hisob-kitob ishlari amalga oshirilib, qancha mol-mulk borligi aniqlangani aytilgandi. Mazkur portlashlar haqida fikr bildirgan mahalliy aholi vakillari portlash uyushtirilgan bo‘lishi mumkinligini taxmin qilgan bo‘lsa, brifingda so‘z olgan Bosh prokuratura vakili esa dastlabki o‘rganishlar portlash biror-bir portlatuvchi modda yoki neft mahsuloti yordamida yuzaga kelganini inkor qilayotganini bildirgandi.
Eslatib o‘tamiz, Surxondaryoning Denov shahri markazidagi “Indenim” savdo majmuasida 7-dekabr tongida kuchli portlash yuz berdi. Rasmiy ma’lumotlarga ko‘ra, portlash oqibatida kamida ikki kishi halok bo‘lgan, to‘qqiz kishi turli tan jarohatlari bilan shifoxonaga yotqizilgan.
Izoh (0)