Англиянинг “Манчестер Сити” клуби ўзбекистонлик марказий ҳимоячи Абдуқодир Ҳусановнинг келажаги борасидаги режаларини очиқлади. Бу ҳақда британиялик журналист Симон Байковскийга таяниб Euro-Football нашри хабар берди.
Манбага кўра, “шаҳарликлар” раҳбарияти 21 ёшли футболчини 2025/26 йилги мавсум жамоада олиб қолишни режалаштирмоқда. Клуб мутасаддилари унинг салоҳиятига ишонади ва ёш футболчига имкон беришда давом этмоқчи. Шунингдек, “Сити”даги бир нечта ҳимоячиларнинг жамоадан кетиши кутилмоқда. Мазкур ҳолат Абдуқодирнинг жамоада қолиш имкониятини оширади.
Маълумот учун, аввалроқ Ҳусановга Англиянинг бошқа бир жамоаси — “Манчестер Юнайтед” ҳам қизиқиш билдираётгани ҳақида хабарлар тарқалган эди.
Эслатиб ўтамиз, ҳимоячи 2025 йил январь ойида Франциянинг “Ланс” клубидан “Манчестер Сити”га кўчиб ўтган. У инглиз клуби сафида шу кунгача 10 та ўйинда майдонга тушиб, битта гол уришга муваффақ бўлди. Бироқ сўнгги вақтларда у захирада қолмоқда. Шу сабабли, ёзги трансфер ойнаси вақтида Абдуқодир клубни тарк этиши мумкинлиги ҳақида хабарлар пайдо бўлди.
Абдуқодир Ҳусановнинг “Сити” билан шартномаси 2029 йил ёзигача амал қилади. Transfermarkt портали футболчининг бозор қийматини 35 миллион еврога баҳолаган.
Изоҳ (0)