Foto: Yava orolida Semeru vulqoni otilishi tufayli yon-atrofdagi qishloqlar kul bilan qoplandi

4-dekabr kuni Indoneziyaning Yava orolidagi Semeru vulqoni otilishni boshladi. Semeru — Indoneziyadagi 130 ga yaqin faol vulqonlardan biri. Undan otilgan kul ustuni 15 kilometr balandlikka ko‘tarildi, natijada aviakompaniyalar o‘z yo‘nalishini o‘zgartirishga majbur bo‘ldi. Vulqon yaqinida joylashgan 11 qishloq, jumladan, Sumber Vulux qalin kul va vulqon changi ostida qoldi. Hududdagi achchiq tutun, elektr energiyasi yo‘qligi va tropik yomg‘ir qidiruv-qutqaruv ishlariga to‘sqinlik qilmoqda, deb yozadi Meduza.

5-dekabr holatiga ko‘ra, vulqon otilishi natijasida kamida 14 kishi halok bo‘lgan. Shu bilan birga, yana 98 kishi, jumladan, ikki homilador ayol qaynoq lavadan kuygan yoki turli darajada jarohatlar olgan. Kamida 35 kishi kasalxonaga yotqizilgan. Vulqon hududida joylashgan Sharqiy Yava provinsiyasidagi Lumajang okrugidan 1300 dan ortiq odam evakuatsiya qilingan.

Avval noyabr oyida Palma orolidagi vulqondan otilgan navbatdagi lava oqimi Atlantika okeaniga yetib borgani, sentabrda esa Kanar orollarida Kumbre-Vyexa vulqonining otilishi tufayli mingga yaqin aholi evakuatsiya qilingani haqida xabarlar berilgan.