Ҳамза Умаров, Зайнаб Садриева ва бошқа кино дарғаларининг ота-онасидек машҳур бўла олмаган санъаткор фарзандлари (фото)

Санъатда ўз ўрнини топиш, замон танламас ижод намуналарини яратиш, элга танилиш ҳаммага ҳам насиб этавермайди. Ҳатто бундай бахт ўша муҳитда тарбияланган фарзандларга ҳам насиб қилмаслиги мумкин.

Зайнаб Садриева нега қизининг актриса бўлишини истамаганди?

Ўзбекистон халқ артисти Зайнаб Садриеванинг қизи Дилбар Исмоилова бу йил 83 ёшни қаршилади. У онасининг касбини танлаб, театр ва дубляж соҳаларида фаолият юритди. Ёдингизда бўлса, у онаси Зайнаб Садриева билан «Келинлар қўзғолони» ва «Фармонбиби аразлади» спектаклларида Лутфи ролини ижро этганди.

Бундан ташқари, томошабинлар уни «Парвона» спектаклидаги прокурор аёл роли орқали  яхши танишади. Онасидек меҳнатсевар ижодкор ҳамон Ўзбекистон давлат драма театрида фаолият юритади.

«Болалигим собиқ Ҳамза театрида ўтган, десам бўлади. Ҳар куни дарсдан кейин театрга борардим. Мен учун олам фақат санъатдан иборат эди. 1955 йили мактабни олтин медалга тамомладим. Хурсанд бўлиб, онамга санъат институтига ҳужжат топшираман десам, йўқ, мен кўрган қийинчиликни кўрмагин, санъатдан ортиб, опанг икковингни тарбиялашга вақтим бўлмаган, деган жавобни олгандим», — дейди Дилбар Исмоилова.

Дилбар Исмоилова фильмларда кам суратга тушди. Унинг фаолияти, асосан, театр ва дубляж билан боғлиқ. У «Аяжонларим», «Вафодор», «Қутлуғ қон», «Дийдор» ва «Заҳарли ҳаёт» каби кўплаб спектаклларда роллар ижро этган.

Ҳамза Умаровнинг ёлғиз ўғли кинони танлади

Ўзбекистон халқ артисти Ҳамза Умаровнинг икки қиз ва бир ўғил фарзанди бор. Ўғли Шуҳрат Умаров ҳозирги кунда киноактёр сифатида фаолият юритади.

«Болалигимда актёр бўлишни истамаганман. Менга кўпроқ цирк санъати ёқарди. Мактабдан кейин цирк томошаларига боришни, артистлар ҳаётини ўрганишни ёқтирардим. От спорти билан бажариладиган трюклар жон-у дилим эди. Мактабни тамомлаган йилим Москва кинемотография институтидан бир гуруҳ ўқитувчилар келиб, уч босқичли танлов асосида Ўзбекистондан талабалар саралаб оладиган бўлишди. Отамнинг таклифлари билан танловда иштирок этдим. Бу шунчаки отамни хурсанд қилиш ва истакларини рад этмаслик эди, холос. Биринчи босқичда иштирок этганимдан сўнг, иккинчи босқичга таклиф этишмади. Қабул қилишмабди деб юрганимда бирдан ўқишга қабул қилинганим ва 15 та талаба билан ўқишга жўнаб кетишимни айтишди. Бу хабардан дадам жуда хурсанд бўлди», — деган эди Шуҳрат Умаров отасининг истагига кўра актёр бўлгани ҳақида.

Ҳамза Умаров бир вақтнинг ўзида театр, кино ва дубляж соҳаларида самарали ижод қилишни уддалай олган. Унинг иштирокидаги «Ўткан кунлар», «Маҳаллада дув-дув гап», «Чинор остидаги дуэл» ҳамда «Алибобо ва қирқ қароқчи» фильмлари ҳамон томошабинлар эътиборида.

Шуҳрат Умаров «Ромео ва Жулетта», «Адвокатлар», «Янги бой», «Тавба», «Ҳақиқат куни» ва «Қудуқ» фильмларида суратга тушган. Айни кунларда 63 ёшни қаршилаган актёр ҳамон уни кашф этадиган ролларни кутиб яшамоқда.

Xumoра Ихтиёрова қизалоқларга дарс беради

Ўзбекистон халқ артистлари Бахтиёр ва Марям Ихтиёроваларнинг турмушидан уч нафар фарзандлари бор эди. Афсуски, кенжа ўғли буйрак етишмовчилиги хасталигидан вафот этган. Тўнғич ўғли эса санъат соҳасида фаолият юритмайди. Фақатгина ижодкорларнинг қизи — Xumoра Ихтиёрова рақс санъатини танлаган ва бугунги кунда балетмейстер бўлиб ишлайди.

Ўзбекистонда хизмат кўрсатган артист Xumoра Ихтиёрова узоқ йиллар раққоса бўлиб ишлаган. 2007 йилдан буён «Султона» қизлар рақс жамоасини тузиб, қизалоқларга санъат сирларини ўргатмоқда. У мактаб қошида ташкил этилган кичик рақс жамоасига раҳбарлик қилади.

Раззоқ Ҳамроевнинг қизи — балет мураббийи

Алишер Навоий образи билан томошабинларга яхши таниш бўлган Ўзбекистон халқ артисти Раззоқ Ҳамроевнинг қизи Гули Ҳамроева Алишер Навоий номидаги Давлат академик катта театрида балет мураббийи сифатида фаолият юритади. Айни дамда 75 ёшни қаршилаган ижодкор ҳамон театрда фаолият юритади.

У фаолиятини 1966 йили балет раққосаси сифатида бошлаган. Гули Ҳамроева 1968- йили Али Ҳамроев режиссёрлигидаги «Дилором» фильмида суратга тушган. Аммо унга 1972 йили суратга олинган «Семурғ» фильмида малика Паризод роли катта омад олиб келган.

Айни кунларда унинг фаолиятини қизи Нодира Ҳамроева давом эттирмоқда.

Жамшид ва Гавҳар Зокированинг қизи — қўшиқчи

Марҳум ижодкор, Ўзбекистонда хизмат кўрсатган артист Жамшид Зокировнинг ўғли Жавоҳир Зокиров актёр эканлигини яхши биламиз. Унинг қизи Оҳиста Жамшид эса 2000 йилдан буён хонандалик билан шуғулланади.

Аслида, унинг фамилияси Зокирова, аммо у аждодларининг улуғ номига доғ туширишдан қўрққан.«Исмим Оҳиста, айримлар ўйлагандек бу тахаллус эмас. Турмуш ўртоғим билан DalaHast гуруҳига асос солганмиз. Йўналишимиз бошқаларга ўхшамайди. Ўзига хослик бор», — дейди Оҳиста Жамшид.

Римма Аҳмедованинг қизини кутилмаганда кинода суратга тушишга чақиришди

Марҳум актриса Римма Аҳмедова ўзбек дубляж санъатининг ёрқин вакилларидан бири ҳисобланади. У «Қирол Лир», «Шоҳ Эдип», «Уфқ», «Келинлар қўзғолони», «Парвона», «Юлдузли тунлар» каби спектаклларда, шунингдек, «Ой бориб, омон қайт», «Даллол», «Юзсиз», «Шўрпешоналар», «Бомба» каби бадиий фильмларда эсда қоларли роллар яратган. Дубльяж соҳасидаги 35 йиллик фаолияти давомида икки мингдан ортиқ қаҳрамонларга овоз берган. Унинг ўғли Бобур Йўлдошев замонамизнинг машҳур актёрларидан бири. Қизи Лола Аҳмедова эса эндигина актрисалик фаолиятини бошлади. У «Мени асра» сериалида суратга тушиб, ўзини актриса сифатида намоён қилди.У асли Шарқшунослик институтининг форс тили факультетида таҳсил олган. Аммо оилавий шароити сабаб ўз мутахассислиги бўйича ишламаган. Бир нечта идораларда ташкилотчи, маъмур вазифаларини бажарган.

«Сериалда суратга тушишимга укамнинг дўсти Аброр Йўлдошев сабаб бўлди. У суратимни режиссёр Бахтиёр Сафаровга кўрсатган. Унга маъқул келиб, ролга таклиф этишди. Мен актриса эмасман, аммо қонимда санъатга қизиқиш бор», — дейди Лола Аҳмедова.Лола Аҳмедова айни кунларда актёр Аброр Йўлдошев бошчилигида очилган Тошкент кино академияси марказида маъмур сифатида фаолият юритади. Ушбу даргоҳ ҳаваскор актёрларни ўқитиш билан шуғулланади.