CNN бошловчиси Крис Куомо ишдан четлатилди. У акаси — шилқимликда айбланган Нью-Йорк собиқ губернаторига ёрдам берган
Американинг CNN телеканали бошловчиси Крис Куомо номаълум муддатга ишдан четлатилди. Крис Куомо — аёлларга шилқимлик қилишда айбланиб истеъфога чиққан Нью-Йоркнинг собиқ губернатори Эндрю Куомонинг укаси.
CNN матбуот хизматининг хабар беришича, телеканал Крис Куомонинг шилқимлик ҳақидаги даъволарга жавоб қайтаришда акасига ёрдам бергани юзасидан ички текширув ўтказмоқда.
Бундай ёрдам ҳақида биринчи марта май ойида маълум бўлган. The Washington Post нашрининг хабар беришича, аёлларга тегажоғлик ҳақидаги даъволардан кейин Крис Куомо акасининг жамоаси билан стратегия машғулотларида қатнашган. CNN ушбу иштирокни «нома’қбул» деб атаган, бироқ бошловчини ишдан олиб ташламаган. Крис Куомонинг ўзи эса акасининг жамоасига ёрдам бериб хато қилганини айтган ва кечирим сўраган.
Аммо жорий ҳафта Нью-Йорк прокурорининг офиси Крис Куомо билан акасининг ёрдамчилари ўртасидаги алоқалар илгари ўйланганидан ҳам яқинроқ бўлганини кўрсатувчи ҳужжатларни эълон қилди, деб хабар берди CNN матбуот хизмати. Хусусан, Крис Куомо акасига қарши яна ким айблов қўймоқчи эканини аниқлашда ўзининг журналистик алоқаларидан фойдаланган.
Крис Куомо 2018 йилдан бери мунтазам равишда CNN телеканалида Cuomo Prime Time таҳлилий янгиликлар дастурини олиб борарди. Дастур иш кунлари соат 21:00 да эфирга узатиларди ва CNN’нинг энг оммабоп шоуларидан бири эди.
Нью-Йорк собиқ губернатори Эндрю Куомо 2021 йилнинг февраль ойида икки собиқ ходимаси томонидан шилқимликда айбланди. Кейинроқ даъвогарларга яна тўққиз нафар аёл қўшилган. Нью-Йорк шаҳар прокуратураси назорати остида ўтказилган тергов улар ҳақиқатни гапираётганини аниқлади. Аёлларнинг маълум қилишича, Куомо уларга тегажоғлик қилиб, номақбул гаплар гапирган.
Айбловларга чап бера олмаган Эндрю Куомо 2021 йилнинг август ойида истеъфога чиқди. 2022 йилда бўлиб ўтадиган кейинги сайловларга қадар губернатор ёрдамчиси Кети Хокул Нью-Йорк губернатори лавозимида ишлайди. У Нью-Йорк штатини бошқарган биринчи аёлга айланди.
