Европа Иттифоқининг Венесуэладаги минтақавий сайловларни кузатиш бўйича миссияси аъзолари ҳисоботида уларни «булғаш» мақсадида жосуслик фаолиятини юритган. Бу ҳақда мамлакат президенти Николас Мадурога таяниб, «Интерфакс» хабар берди.
«Улар сайлов жараёнини ‘булғаш’ни истади, аммо буни уддалай олмади. Жосуслар делегацияси (Европа Иттифоқидан — таҳр.) кузатувчи эмас эди — улар мамлакатнинг ижтимоий, иқтисодий ва сиёсий ҳаётини кузатиб, эркин ҳаракатланиб юрди», — дейди Мадуро. Шу билан бирга, у сайлов жараёни «бенуқсон, ажойиб» ўтганини қўшимча қилган.
21 ноябрь куни Венесуэлада бўлиб ўтган минтақавий сайловлар натижасига кўра Мадуро партияси — Венесуэла бирлашган социалистик партияси ишончли ғалабани қўлга киритган.
Сайловларни мингдан ортиқ хорижлик кузатувчилар кузатиб борган бўлиб, улар айрим қонунбузилишларни ҳисобга олмаганда сўнгги 20 йил ичидаги энг яхши сайлов бўлганини тан олган. Европа Иттифоқи кузатувчилари эса якуний ҳисоботни 2022 йилнинг бошида тақдим этади.
Эслатиб ўтамиз, 22 февраль куни Европа Иттифоқи Венесуэла расмийларига қарши янги санкциялар эълон қилди. Чекловлар 19 нафар мансабдор, жумладан, Миллий сайлов кенгаши президенти Индира Алфонсо, кенгаш вице-президенти Леонардо Моралес, Қуролли кучлар стратегик операциялар қўмондонлиги раҳбари, адмирал Ремихио Себалос Ичасо, шунингдек, Миллий ассамблея аъзолари ва судьяларга нисбатан жорий этилди.
Бунга жавобан Венесуэла ҳукумати 24 февраль куни Евроиттифоқ элчиси Исабел Брилянте Педросони persona non grata деб эълон қилди ва унга мамлакатдан чиқиб кетиш учун 72 соат муҳлат берди. Евроиттифоқ эса Венесуэла дипломатик ваколатхонаси раҳбарини ўз ҳудудидан чиқариб юборди.
Изоҳ (0)