Ўзбекистон ва Қозоғистон бош вазирлари Абдулла Арипов ва Асқар Мамин 26 ноябрь куни Туркистонда бўлиб ўтган икки мамлакат ўртасидаги учинчи минтақалараро ҳамкорлик форуми доирасида музокаралар ўтказди, деб хабар қилди Қозоғистон бош вазири матбуот хизмати.
Марказий Осиёдаги минтақавий савдонинг қарийб 70 фоизи Қозоғистон ва Ўзбекистон ҳиссасига тўғри келади. 2021 йилнинг 9 ойида ўзаро товар айирбошлаш ҳажми 2,9 миллиард доллардан ошди, бу 2020 йилнинг шу даврига нисбатан 28,5 фоизга кўпдир.
«Машинасозлик, қурилиш индустрияси ва фармацевтика саноати соҳасида янги қўшма лойиҳалар учун бошқа салоҳиятли ўсиш нуқталари ҳам мавжуд», — деди Асқар Мамин.
Ҳукумат раҳбарлари ўзаро товар айирбошлаш ҳажмини 2022 йилда 5 миллиард долларга, 5 йил ичида эса 10 миллиард долларга етказишга келишиб олди.
Форум доирасида машинасозлик, агросаноат комплекси, қурилиш материаллари, электротехника маҳсулотлари, тиббиёт буюмлари ишлаб чиқариш, инфратузилмани ривожлантириш ва саноатнинг бошқа соҳаларида умумий қиймати 611,3 миллион долларлик 54 та инвестиция ва тижорат шартномалари имзоланди.
Қозоғистон бош вазири икки давлат ўртасида атроф муҳитни муҳофаза қилиш, сув ва ўрмон хўжалиги соҳасидаги ҳамкорлик муҳимлигини таъкидлади. Биргаликда саъй-ҳаракатлар натижасида вегетация даврида Тўқтўғул ва Қайроққум сув омборларидан қўшимча сув оқизилиши таъминланди, бу эса икки давлат қишлоқ хўжалиги маҳсулотлари етиштирувчиларининг эҳтиёжини таъминлади.
Асқар Мамин, шунингдек, Орол денгизининг қуриган тубида саксовул плантацияларини экиш бўйича саъй-ҳаракатларни мувофиқлаштириш таклифини билдирди.
Изоҳ (0)