Туркманистон президенти Гурбангули Бердимуҳамедов ўғли, иқтисодиёт бўйича бош вазир ўринбосари Сердар Бердимуҳамедовга мамлакатнинг нефть-газ комплексини назорат қилиш вазифасини топширди. Бу ҳақда «Нейтралний Туркманистон» ҳукумат газетаси хабар берди.
Сердар Бердимуҳамедов нефть-газ комплексининг молиявий ҳолатини, жумладан, унинг салоҳиятини рўёбга чиқариш бўйича саъй-ҳаракатларни мунтазам кузатиб бориш, ушбу соҳани доимий назорат қилиб туришга масъул раҳбар этиб белгиланди. Туркманистон газ экспорти географиясини қисқа, ўрта ва узоқ муддатли асосда кенгайтиришни режалаштирган, дейилади хабарда.
Шунингдек, Туркманистон президенти ёнилғи захираси бўйича дунёда етакчи ўринлардан бирини эгаллаб турган Галкиниш конидаги ишларни фаоллаштириш юзасидан ҳам кўрсатмалар берган.
Сердар Бердимуҳамедов 40 ёшда. У Гурбангули Бердимуҳамедовнинг ягона ўғли. 2020 йилнинг февралида Сердар Бердимуҳамедов саноат вазири лавозимини эгаллаган, 2021 йилнинг февралидан эса Туркманистон бош вазири ўринбосари лавозимида ишлаб келаётган эди. Июль ойида Сердар Бердимуҳамедов бош вазирнинг молия ва иқтисодиёт бўйича ўринбосари этиб тайинланган.
Туркманистонда бош вазир лавозими йўқ, ҳукуматни раҳбар сифатида президентнинг ўзи бошқаради.
Изоҳ (0)