Ёш режиссёр Шокир Холиқов яратган «Қиз ва булут» анимацион фильми Японияда ўтказилган «DigiCon6 Asia» анимацион фильмлар фестивалида иккита мукофотни қўлга киритди. Фильм «Минтақанинг олтин фильми» ва «Фестивальнинг олтин фильми» номинацияларида ғолиб деб топилиб, 3 минг АҚШ доллари мукофоти билан тақдирланди.
Ёдингизда бўлса, Шокир Холиқов «Дарё»га берган интервьюсида Ўзбекистон халқ шоири Усмон Азимнинг «Ёмғир ҳақида баллада» шеъри асосида 10 дақиқалик анимацион фильм яратишда моддий қийинчиликларга учраб, «Ўзбеккино»га ёрдам сўраб боргани ва улардан рад жавоби олгани ҳақида айтганди. Мазкур анимацион фильм шу кунгача Қирғизистон ва Японияда ўтказилган фестивалларда ғолиб бўлди. Энди у Жанубий Америка ва Италияда ўтказиладиган халқаро фестивалларда иштирок этади.
Маълумот ўрнида, Шокир Холиқов бунгача 40 дан ортиқ халқаро фестиваллар ғолиби бўлган эди. Унинг «Месси» номли қисқа метражли фильми 48 Hour film race халқаро фестивалида иккита мукофотни қўлга киритган.
Изоҳ (0)