Yosh rejissor Shokir Xoliqov yaratgan “Qiz va bulut” animatsion filmi Yaponiyada o‘tkazilgan “DigiCon6 Asia” animatsion filmlar festivalida ikkita mukofotni qo‘lga kiritdi. Film “Mintaqaning oltin filmi” va “Festivalning oltin filmi” nominatsiyalarida g‘olib deb topilib, 3 ming AQSh dollari mukofoti bilan taqdirlandi.
Yodingizda bo‘lsa, Shokir Xoliqov “Daryo”ga bergan intervyusida O‘zbekiston xalq shoiri Usmon Azimning “Yomg‘ir haqida ballada” she’ri asosida 10 daqiqalik animatsion film yaratishda moddiy qiyinchiliklarga uchrab, “O‘zbekkino”ga yordam so‘rab borgani va ulardan rad javobi olgani haqida aytgandi. Mazkur animatsion film shu kungacha Qirg‘iziston va Yaponiyada o‘tkazilgan festivallarda g‘olib bo‘ldi. Endi u Janubiy Amerika va Italiyada o‘tkaziladigan xalqaro festivallarda ishtirok etadi.
Ma’lumot o‘rnida, Shokir Xoliqov bungacha 40 dan ortiq xalqaro festivallar g‘olibi bo‘lgan edi. Uning “Messi” nomli qisqa metrajli filmi 48 Hour film race xalqaro festivalida ikkita mukofotni qo‘lga kiritgan.
Izoh (0)