«Ўргимчак-одам: уйга йўл йўқ» суперқаҳрамон ҳақидаги фильмлар давомининг расмий трейлери эълон қилинди, деб хабар бермоқда Harper’s Bazaar Kazakhstan нашри. Фильмнинг янги қисмида Питер Паркер ўзининг кимлиги ошкор этилишига йўл қўймаслик истагини билдирганидан сўнг дунёдаги бир неча ёвуз одамларга қарши курашади.
Аввалроқ ёз охирларида фильмнинг биринчи тизери чиққанди, шундан сўнг мухлислар тўлиқ трейлерни интиқлик билан кутишаётган эди.
Marvel компанияси янги трейлерда анчагина сирларни очиб берган. Франшизанинг ашаддий мухлислари фильмда Электро, Қумодам, Симбиот, Яшил Гоблин ва Доктор Стренж каби кўплаб таниш чеҳраларни кўришлари мумкин. Бундан ташқари, фильм давомида Питер Паркернинг севгилиси ролида Зендая намоён бўлади.
Бош роль ижрочиси Том Ҳолланд октябрда берган интервьюсида мазкур фильм унинг «Ўргимчак-одам» франшизасидаги иштирокининг «кулминацион нуқтаси» бўлиши мумкинлигини айтганди. Актёр, шунингдек, «Ўргимчак одам: уйга йўл йўқ» фильми у суратга тушган суперқаҳрамон ҳақидаги энг яхши фильм эканини ҳам таъкидлаган.
Фильм режиссёри Жон Уотц бўлиб, у трилогиянинг олдинги қисмларини «Ўргимчак-одам: уйга қайтиш» ва «Ўргимчак-одам: уйдан узоқда» фильмлари билан танилган.
Фильмнинг Қозоғистондаги премьераси 2021 йил 16 декабрда бўлиши режалаштирилмоқда.
Изоҳ (0)