«Калмар ўйини-2»: сериалнинг давоми ҳақида нималар маълум?

Netflix платформасида тақдим қилинган «Калмар ўйини» 2021 йилнинг энг машҳур лойиҳаларидан бири бўлди. Турли танқидлар бўлганига қарамай, мухлисларнинг ушбу фильмга бўлган қизиқиши тобора ортиб бормоқда. Аксарият томошабинларни эса «Калмар ўйини»нинг иккинчи фасли қачон тақдим этилиши қизиқтирмоқда. Келаси мавсумнинг сценарийси энди ёзилаётганига қарамай, Harper’s Bazaar нашри Squid game билан боғлиқ маълумотларни умумлаштирди.

Актёрлар таркиби

Сериал сюжети иштирокчиларнинг тирик қолиш учун курашиши ва ўйин сўнгида биргина қаҳрамон ғолиб бўлишидан келиб чиқилса, вафот этган қаҳрамонлар кейинги мавсумда иштирок этмайди, деб хулоса қилиш мумкин. Сон Ки Хун ва Хван Чун Хо бундан мустасно. Негаки, полициячига ўқ узилгач, унинг тирик қолган ёки йўқлиги аниқ эмас. Детектив ролини ижро қилган актёрнинг ҳам сериал давомида кўриниш бериши эҳтимоли йўқ эмас. «Детектив ўладиган даражада яраланган, деб ҳисобламайман», — деган Ви Ха Жун берган интервьюларидан бирида. Шунингдек, томошабинлар сериалда бошловчини гавдалантирган актёрни ҳам кейинги қисмларда кўриши мумкин бўлади. Сериалнинг якунида Ки Хуннинг кейинги ўйинда иштирок этадиган янги иштирокчилар ҳақида хабар топиши бежиз эмас.

Воқеалар ривожи

Хван Дон Хёк сериалнинг иккинчи фаслида воқеалар қандай кечишини ҳали режалаштирмаганини бир неча марта такрорлаган. Биринчи мавсумнинг сўнгги қисмидаги якундан кейин кўплаб саволлар пайдо бўлган. Самолётга чиқмаган Сон Ки Хуннинг қаерга боргани, ўйиннинг янги бошқарувчиси ким экани, нима учун полиция мағлубларнинг тақдири ўлим билан тугайдиган хавфли лойиҳага кўз юмгани шулар жумласидан. Умуман воқеалар ривожи қандай давом этишини вақт кўрсатади.

«Ўйлашимча, полиция билан боғлиқ муаммо фақат корейсларда эмас. Жаҳон янгиликларида полициянинг аксарият ҳолларда жуда кеч чора кўргани ва етарли бўлмаган тезликда муносабат билдирганини кўраман, шу сабаб ҳам қурбонлар сони тобора ортиб бормоқда. Бу мен кўтаришни истаган муаммо. Иккинчи мавсумда буни батафсилроқ очиб бераман, эҳтимол», — деган режиссёр.

Тўлиқ метражли фильм

Режиссёр сериал мотиви асосида тўлиқ метражли фильм суратга олишни режалаштирган. «Ақлимда юксак даражадаги картина бор, аммо унинг устида ишлашга дарров киришмоқчи эмасман. Мен суратга олишни истайдиган фильм бор. Мен бундан биринчи бўлиб нима қилиш мумкинлиги ҳақида ўйлаяпман. Аммо дастлаб Netflix билан бу ҳақида гаплашиб олиш керак», — деб қўшимча қилган режиссёр.