Қашқадарё вилоятининг собиқ ҳокими Зоир Мирзаев ўрнатилишини тўхтатган Қарши шаҳридаги улкан байроқ шаҳар ҳокими Нормўмин Холбоев томонидан 2021 йил 15 ноябрда имзоланган қарор билан қайта бунёд этилаётгани хабар берилганди. Қарши шаҳар ҳокимлигининг маълумот беришича, мазкур масала жамоатчиликка маълум бўлгач, байроқ ўрнатилиши яна тўхтатилган.
«Оммавий ахборот воситалари ва ижтимоий тармоқларда Қарши шаҳрида ўрнатилиши тўхтатилган байроқ устуни қайта бунёд этилади, деган мазмунда хабарлар тарқалганди. Бунга муносабат тарзида Қарши шаҳрида ўрнатиладиган байроқ устунининг ўрнатилиш ишлари Қарши шаҳар маҳаллий бюджетининг 2021 йилнинг III-чорак якуни бўйича даромадлар режасининг ошириб бажарилган қисмидан ажратилган маблағлар ҳамда ҳомийлик ёрдами ҳисобига давом эттирилиши хабар қилинганди. Ижтимоий тармоқларда муҳокамаларга сабаб бўлган бу масалага вилоят ҳокими эътибор қаратиб, шаҳар ҳокими билан келишган ҳолда улкан байроқ устуни ўрнатилмайдиган бўлди», — дейилади Қарши шаҳар ҳокимлиги ахборот хизмати муносабатида.
Қўшимча қилинишича, даромадлар режасининг ошириб бажарилган қисмидан қолган маблағлар ички йўллар таъмири ва коммунал соҳаларни ривожлантиришга йўналтирилади.
Эслатиб ўтамиз, аввалроқ вилоятнинг собиқ ҳокими ўрнатилишини тўхтатган байроқ устунга сарфланадиган маблағ Қарши шаҳридаги хороба ётоқхоналардан бирига сафралангани, 1 миллиард 350 миллион сўмлик байроқ ўрнатилиши эса тўхтатилгани маълум қилинганди. Қарши шаҳар ҳокими эса мазкур ташаббусни давом эттириб, байроқ устун ўрнатилишига 300 миллион сўм маблағ ажратди. Холмўмин Норбоевнинг ўринбосари эса мазкур маблағ байроқ ўрнатилиши учун етмаслигини, қўшимча маблағ берилишини тахмин қилганди. Шунингдек, дастлабки лойиҳа ўзгартирилиб, маблағ камайтирилиши мумкинлигини ҳам қўшимча қилганди.
Изоҳ (0)