Qashqadaryo viloyatining sobiq hokimi Zoir Mirzayev o‘rnatilishini to‘xtatgan Qarshi shahridagi ulkan bayroq shahar hokimi Normo‘min Xolboyev tomonidan 2021-yil 15-noyabrda imzolangan qaror bilan qayta bunyod etilayotgani xabar berilgandi. Qarshi shahar hokimligining ma’lumot berishicha, mazkur masala jamoatchilikka ma’lum bo‘lgach, bayroq o‘rnatilishi yana to‘xtatilgan.
“Ommaviy axborot vositalari va ijtimoiy tarmoqlarda Qarshi shahrida o‘rnatilishi to‘xtatilgan bayroq ustuni qayta bunyod etiladi, degan mazmunda xabarlar tarqalgandi. Bunga munosabat tarzida Qarshi shahrida o‘rnatiladigan bayroq ustunining o‘rnatilish ishlari Qarshi shahar mahalliy budjetining 2021-yilning III-chorak yakuni bo‘yicha daromadlar rejasining oshirib bajarilgan qismidan ajratilgan mablag‘lar hamda homiylik yordami hisobiga davom ettirilishi xabar qilingandi. Ijtimoiy tarmoqlarda muhokamalarga sabab bo‘lgan bu masalaga viloyat hokimi e’tibor qaratib, shahar hokimi bilan kelishgan holda ulkan bayroq ustuni o‘rnatilmaydigan bo‘ldi”, — deyiladi Qarshi shahar hokimligi axborot xizmati munosabatida.
Qo‘shimcha qilinishicha, daromadlar rejasining oshirib bajarilgan qismidan qolgan mablag‘lar ichki yo‘llar ta’miri va kommunal sohalarni rivojlantirishga yo‘naltiriladi.
Eslatib o‘tamiz, avvalroq viloyatning sobiq hokimi o‘rnatilishini to‘xtatgan bayroq ustunga sarflanadigan mablag‘ Qarshi shahridagi xoroba yotoqxonalardan biriga safralangani, 1 milliard 350 million so‘mlik bayroq o‘rnatilishi esa to‘xtatilgani ma’lum qilingandi. Qarshi shahar hokimi esa mazkur tashabbusni davom ettirib, bayroq ustun o‘rnatilishiga 300 million so‘m mablag‘ ajratdi. Xolmo‘min Norboyevning o‘rinbosari esa mazkur mablag‘ bayroq o‘rnatilishi uchun yetmasligini, qo‘shimcha mablag‘ berilishini taxmin qilgandi. Shuningdek, dastlabki loyiha o‘zgartirilib, mablag‘ kamaytirilishi mumkinligini ham qo‘shimcha qilgandi.
Izoh (0)