«Ўзбекистон Республикасида коррупцияга қарши курашиш тизимини такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун 19 ноябрдан кучга кирди, деб хабар беради ЎзА.
Қонун билан Жиноят-ижроия кодекси, «Жиноят ишини юритиш чоғида қамоқда сақлаш тўғрисида» ҳамда «Маъмурий қамоқни ўташ тартиби тўғрисида»ги қонунларга қўшимча киритилган.
Эндиликда қонун билан Коррупцияга қарши курашиш агентлиги ходимлари коррупциявий ҳуқуқбузарликлар содир этилишини ўрганиш ва таҳлил қилиш учун жазони ижро этиш муассасаларига монеликсиз кириш, ҳужжатлар билан танишиш ҳуқуқига эга бўлган.
Шунингдек, Олий Мажлис Қонунчилик палатаси ва Сенатининг регламентлари тўғрисидаги ҳамда «Парламент назорати тўғрисида»ги қонунларда Қонунчилик палатаси ва Сенатнинг Коррупцияга қарши курашиш агентлиги томонидан тайёрланадиган Ўзбекистонда коррупцияга қарши курашиш тўғрисида миллий маърузасини кўриб чиқиш тартиби белгиланди.
Унга кўра, Қонунчилик палатаси ва Сенат Миллий маърузани дастлабки тарзда кўриб чиқиб, фикр ва таклифлар ишлаб чиқади. Палата мажлисларида мажбурий равишда ҳар томонлама муҳокама қилади. Парламент палаталарининг Миллий маърузани кўриб чиқиш бўйича қабул қилган қарорлари агентликка юборилади.
БМТнинг Коррупцияга қарши конвенциясига Ўзбекистоннинг қўшилиши тўғрисидаги қонунда коррупциянинг олдини олиш бўйича аниқ чора-тадбирлар ишлаб чиқиш ва уларни амалга оширишда бошқа давлатларга ёрдам кўрсатадиган органлар қаторига Коррупцияга қарши курашиш агентлиги ҳам киритилган.
«Коррупцияга қарши курашиш тўғрисида»ги ва «Прокуратура тўғрисида»ги қонунларга киритилган ўзгартиш ва қўшимчаларга биноан Коррупцияга қарши курашиш агентлиги коррупцияга қарши курашиш бўйича фаолиятни амалга оширувчи давлат органлари қаторига киритилган.
Коррупцияга қарши курашиш бўйича республика идоралараро комиссияси Ўзбекистон коррупцияга қарши курашиш миллий кенгаши этиб қайта ташкил этилиши муносабати билан қонунчиликка тегишли нормалар киритилган.
«Ҳуқуқбузарликлар профилактикаси тўғрисида»ги қонунда Коррупцияга қарши курашиш агентлиги ҳуқуқбузарликлар профилактикасини бевосита амалга оширувчи органлар рўйхатига киритилган ва унинг шу соҳадаги ваколатлари белгиланган.
Эндиликда коррупцияга оид ҳуқуқбузарликлар тўғрисида ахборот бераётган шахслар ва уларнинг қариндошлари давлат ҳимоясида бўлади.
Бундай шахсларнинг ҳаёти ва соғлигига ҳақиқий таҳдидни, уларга нисбатан зўрлик ишлатилганини, мол-мулки йўқ қилингани ёки шикастлантирилганини тасдиқловчи етарли асослар мавжуд бўлган тақдирда коррупцияга қарши курашишни амалга оширувчи органлар «Жабрланувчиларни, гувоҳларни ва жиноят процессининг бошқа иштирокчиларини ҳимоя қилиш тўғрисида»ги қонунга мувофиқ, уларни ҳимоя қилиш бўйича зарур чоралар кўриши шарт.
Аввалроқ Ўзбекистонда ўзаро қариндошларнинг давлат корхонасида бири иккинчисига бўйсуниб ишлаши тақиқланиши мумкинлиги, Ўзбекистонда олий таълим ва қурилишни коррупциясиз соҳага айлантириш бўйича «йўл харитаси» ишлаб чиқилиши тўғрисида хабар берилганди.
Изоҳ (0)