Қашқадарё вилояти Қамаши туманидаги ҳомиладорларни туғруқхонага етказиш учун дарёдан замбилда олиб ўтиладиган, жин кўприкдан йиқилганлар эса ногирон бўлиб қолаётган Калтатой қишлоғи ҳақида хабар қилинганди. «Дарё» мухбири қишлоқдаги жин кўприк қайта қурилиб, фойдаланишга топширилганини маълум қилди.
Қайд этилишича, янги кўприк 7 миллиард 532 миллион сўмга қайта қурилиб, фойдаланишга топширилган. «Сектор раҳбарлари, оқсоқоллар ва маҳаллий аҳоли вакиллари иштирокида ушбу кўприкнинг расмий очилиш маросими ўтказилди ва аҳолининг узоқ йиллик орзуси рўёбга чиқди», — дейди Қамаши туман ҳокимлиги ахборот хизмати раҳбари Нурбек Расулов.
Маълум бўлишича, «Довуд» маҳалла фуқаролар йиғини ҳудудида жойлашган, маҳаллий аҳоли томонидан қурилган осма кўприкдан аввал 20 минг нафарга яқин фуқаро фойдаланган.
«Ёғингарчилик даврида дарёдан ўтишда қийинчиликлар кузатиларди. Ушбу ҳудудда замонавий кўприк барпо этилиши қишлоқ аҳлининг узоқ йиллик орзуси бўлиб келган. Давлатимиз раҳбарининг 2020 йил вилоятга ташрифидан сўнг ушбу муаммога ечим топилди. Кўприк қурилиши учун маблағ ажратилди», — деган ҳокимлик вакили.
Таъкидланишича, кўприк «Сурхондарё хушвақтли Ангор» хусусий корхонаси томонидан узунлиги 108 ва эни 9 метр ўлчамда қурилган.
Эслатиб ўтамиз, 2021 йилнинг январида Қамашидаги Калтатой қишлоғи аҳолисининг муаммоси ижобий ечим топиши, ҳомиладор аёлларни олиб ўтиб бўлмайдиган жин кўприк 5,4 миллиард сўмга қайта қурилиши хабар қилинганди.
Изоҳ (0)