Россияда бахтсиз ҳодиса оқибатида вафот этган ўзбекистонлик меҳнат мигрантининг оиласига 1 миллион рублдан ортиқ маблағ ундириб берилди. Бу ҳақда Ташқи меҳнат миграцияси агентлиги матбуот хизмати хабар берди.
Маълум қилинишича, фуқаро Б.Ю.(1994 йилда туғилган) Россиянинг «Монотек Строй» МЧЖда иш бошлаганидан 2 ой-у 5 кун ўтиб, 2020 йилнинг 21 сентябрида ишлаб чиқаришдаги бахтсиз ҳодиса оқибатида вафот этган. Унинг Хоразм вилоятида ота-онаси билан бирга яшовчи турмуш ўртоғи (1995 йилда туғилган) ва қизи (2019 йилда туғилган) қолган.
Марҳумнинг оиласига зарарни ундириб бериш бўйича Ўзбекистон Вазирлар Маҳкамаси, Бандлик ва меҳнат муносабатлари вазирлиги, Ташқи меҳнат миграцияси агентлиги томонидан россиялик юристлар жамоаси жалб этилиб, узоқ давом этган жараёнлардан сўнг 1 миллион 161 минг рубль (15 774 доллар) маблағ тўлаб бериш бўйича иш берувчи билан юридик келишувга эришилган.
Шунингдек, Россия қонунчилигига мувофиқ, марҳумнинг оиласига жабрланувчининг иш жойида бахтсиз ҳодиса оқибатида вафот этгани муносабати билан 1 миллион рубль атрофида компенсация берилиши ҳам кўзда тутилган.
Қайд этилишича, ҳозирда Россия Ижтимоий суғурта жамғармасидан ушбу маблағни ундириш ва марҳумнинг вояга етмаган қизига 18 ёшга тўлгунга қадар нафақа тайинлаш масаласи ҳал қилинмоқда.
Агентлик берган маълумотга кўра, 2021 йилнинг 10 ойи давомида хорижда вафот этган 361 нафар фуқаро жасади олиб келинган, 408 нафар хорижда қийин аҳволда қолган фуқаролар қайтарилган, оғир тан жароҳати олган 12 нафар меҳнат мигрантининг тиббий хизмат харажатлари қоплаб берилган.
Шунингдек, 5 минг 984 нафар меҳнат мигрантига бир марталик моддий ёрдам ажратилган, 308 нафар меҳнат мигранти вақтинча ҳостелга жойлаштирилган.
Бундан ташқари, хорижда меҳнат фаолиятини амалга ошираётган 7 992 нафар меҳнат мигрантига ҳуқуқий ёрдам, 288 352 нафарига маслаҳат хизматлари, 6 194 нафарига ижтимоий ёрдам, 10 951 нафарига моддий ёрдам кўрсатилган.
Изоҳ (0)