Мухлисларга «Ниқоб» фильмидаги роли билан яхши таниш бўлган Голливуд юлдузи Кемерон Диазнинг ҳаёти ҳақида маълумот бериб ўтамиз.
1972 йил 30 августда АҚШнинг Сан-Диэго шаҳрида таваллуд топган Кемероннинг отаси Эмилио нефть қазиб олиш компаниясининг ишчиси бўлган. Онаси Билли Жоан эса савдо компаниясида брокер сифатида фаолият юритган. Актрисанинг Майкл исмли акаси ва Шимен исмли опаси бор. Long Beach Polytechnic мактабида таълим олган. Аммо политехникага ихтисослашган мактабдан кўнгли тўлмаган Диаз, кўпроқ кинога қизиққан.
Карьера
Кўнгилочар тадбирлардан бирида фотограф Жеф Дюнасс билан танишган 16 яшар Кемероннинг ҳаёти шундан кейин ўзгариб кетган. Жефнинг моделлик агентлигида ишлаш таклифига рози бўлганидан сўнг Calvin Klein, Levi’s ва Coca-Cola сингари машҳур брендлар билан ҳамкорлик қилган, сурати журнал муқоваларида чоп этила бошлаган.
Унинг кинодаги дебюти 1994 йилда бўлган. Актриса «Ниқоб» (The Mask) фильмида бош қаҳрамонни ўйнаганидан кейин машҳурликка эришган. «Чарли фаришталари» (Charlie’s angels)да Дрю Берримор ва Люси Лью билан ижро қилган махсус жосус роли ҳам аввалгидан кам омадли чиқмаган. Жуд Лоу билан бирга кўриниш берган «Таътиллар алмашганда» (The Holiday) фильми ҳам мухлислар қалбидан жой олган. Айни вақтда ҳам суратга тушишда давом этаётган Диаз, мультфильм қаҳрамонларига ҳам овоз беради. «Шрек» мультфильмидаги Фиона ҳам актрисанинг овози билан гапирган.
Шахсий ҳаёт
Унинг илк жиддий муносабатлари продюсер Карлос Де Ла Торе билан бўлган. Беш йилдан сўнг ажрашганига қарамай, дўстона алоқаларини сақлаб қолган. Уч йил учрашиб юрган Мэтт Диллон билан хайрлашганидан кейин Жаред Лето билан унаштирилган. 2003 йилда нуқта қўйилган муносабатлар тўйгача етиб бормаган. Кейин ўзидан 8 ёш кичик Жастин Тимберлейкка кўнгил қўйган. 2007 йилда турмуш қуриши керак бўлганига қарамай, ушбу санага қадар ҳар иккиси бошқа йўллардан кетишга қарор қилган. Шундан сўнг Алекс Родригес билан қисқа муддат учрашиб юрган. 2015 йилда Good Charlotte гуруҳи аъзоси, мусиқачи Бенжи Медден билан оила қурган. 2019 йил актриса илк бор она бўлган. Дунёга келган қизалоққа Реддикс Медден деб исм қўйган.
Изоҳ (0)