Самарқандда туғилган MMA жангчиси Гуамда шифокорнинг ўлимида айбланиб, ҳибсга олинди. Спортчи айбига иқрор бўлган

Келиб чиқиши Самарқанд шаҳридан бўлган MMA жангчиси Акмал Ҳожиев шифокорнинг ўлимида гумонланиб, ҳибсга олинди.

MMA Junkie’нинг хабар қилишича, Гуам оролида истиқомат қилувчи Акмал Ҳожиев шифокор билан коронавирусга қарши вакцина борасидаги тортишув сабаб қотилга айланган. Қайд этилишича, Ҳожиев оммавий эмланишга қарши бўлган.

Хабарга кўра, жангчи ва шифокор Миран Рибати ўзаро таниш бўлган. Улар битта машғулот залида шуғулланган. Қотиллик спортчининг уйида содир этилган. Унинг онаси ва синглиси бунга гувоҳ бўлган.

ОАВнинг қайд этишича, Ҳожиев ўзаро тортишувдан кейин шифокорни бўға бошлаган. Акмал Рибатига усул қўллаб, уни ҳаракатсизлантирган. Гувоҳлар полиция чақирган ва Ҳожиевни тўхтатишга уринган. Кейинчалик у ошхонадан тушликдан қолган суякни олиб, уни бир неча бор шифокорга санчган. Рибати шунда ҳам ўрнидан турган ва қочишга уринган, бироқ спортчи унга пичоқ билан ҳамла қилган ва Рибатни ўлдирган.

Полиция воқеа жойига етиб келган, Ҳожиев ўша заҳоти айбини тан олган.

Таъкидланишича, спортчининг руҳий ҳолатида муаммолар бўлиб турган. Турли жанжал ва тортишувлар сабаб у иккита жангчилар клубидан ҳайдалган.

Ҳожиев профессионал MMA’да тўртта жанг ўтказиб, уларнинг учтасида ғалаба қозонган. У 2017 йилда ўзбекистонлик Абдулазиз Жўрабоевни мағлуб этганди.