Ливия миллий армияси (ЛМА) бош қўмондони, фелдмаршал Халифа Ҳафтар Ливия президентлиги учун сайловларда иштирок этишини маълум қилди, деб хабар беради «Интерфакс».
«Сайловлар — мамлакатимиз ботиб қолган оғир инқироздан чиқишнинг ягона йўли», — дейди Ҳафтар ўз нутқида.
2011 йилда Ливия инқилоби етакчиси Муаммар Каддафи ағдарилиб, қатл этилганидан сўнг, Ливияда ягона бошқарув органи тузишга муваффақ бўлинмади. Мамлакатда қўшҳукумат ўрнатилди: бир томондан, Бирлашган Миллатлар Ташкилоти тан олган бош вазир Фаиз Сарраж бошчилигидаги Миллий келишув ҳукумати (МКҲ), бошқа томондан, Ҳафтар томонидан қўллаб-қувватланган бош вазир Абдулла Абдурраҳмон ат-Тани бошчилигидаги муваққат ҳукумат.
Ливия можароси томонлари бир неча йил давомида хориж кучларидан ёрдам олиб келган. Хусусан, Халифа Ҳафтарнинг Ливия миллий армиясига «Вагнер» хусусий ҳарбий компанияси ёрдам берган. Туркия ўзининг ҳарбий маслаҳатчиларини Ҳафтарга қарши турган Ливия миллий келишув ҳукуматига ёрдамга жўнатиб турган. Шунингдек, Анқара ташаббуси билан Ливияга Суриядан ёлланма аскарлар ташлангани тўғрисида маълумотлар мавжуд. Узоқ вақтдан бери давом этаётган қуролли можаро давомида Ҳафтар ҳам Миллий келишув ҳукумати ҳам ғалабага эришмаган. Натижада Ливия сиёсий келишув томон ҳаракатлана бошлади.
Қарама-қаршилик 2020 йилнинг октябрь ойигача давом этди. Ўшанда МКҲ ва ЛМА бўлинмаларининг беш нафардан ҳарбий хизматчисини ўз ичига олган қўмита аъзолари Женевада сулҳ битимини имзолади.
Февраль ойида Швейцарияда БМТ ҳузурида ўтказилган Ливия сиёсий мулоқоти форуми давомида ягона ҳукумат ва давлат раҳбари вазифасини бажарувчи президент кенгаши сайланди. Кенгашга Ливияда декабрь ойида ўтказиладиган президент ва парламент сайловларига тайёргарлик кўриш ва уларни ўтказиш вазифаси юклатилди.
Изоҳ (0)