Онасини энг яқин дўсти деб ҳисоблайдиган юлдузлар (фото)

Эришган машҳурлиги ва муваффақиятларига онасини сабабчи деб биладиган ва уларга ташаккур билдиришдан чарчамайдиган юлдузлар ҳақида маълумот бериб ўтамиз.

Рами Малек ва Нелли Малек

Рами Малек «Bohemian Rhapsody» фильмидаги роли учун Энг яхши актёр йўналиши бўйича «Оскар»га сазовор бўлганида биринчи бўлиб онасига миннатдорлик билдирган. «Онам шу ерда бўлиши керак, сизни яхши кўраман, хоним», — деган у. Актёр эришган муваффақиятларига онасини сабабчи деб билади.

Крис Претт ва Кети Претт

Крисс эса Instagram саҳифасидаги постлардан бирини онасига бағишлаган. «Оналар байрами билан ойижоним Кетини табриклайман. Биз билан улашган бахтиёрлигингиз, самимий орзулар, ўйин-кулгига бўлган эҳтирос учун раҳмат. Фарзандларингиз айнан сиз онамиз эканидан миннатдор. Сиз бизга ҳар бир лаҳзани туҳфа қилгансиз ва барча қийинчиликларга қарамай, ҳар куни юзимизда табассум бўлган. Раҳмат. Сизни яхши кўраман», — деган у.

Риз Уизерспун ва Бетти Риз

Оналар кунида Риз ҳам волидаси билан тушган суратни улашиб, унга қуйидагича изоҳ ёзиб қолдирган: «Онам билан мулоқот қиладиган вақт кунимнинг энг яхши қисмидир. Унинг донолиги, табассуми, аҳмоқона ҳазилларимга кулиб жавоб беришини яхши кўраман. Юзида табассум кўрсам бўлди, куним аъло ўтади. Уни бағримга босишни интиқиб кутаман. Менга ҳамма нарсадан кўпроқ шу етишмайди. Имкони борлар бугуноқ бориб, онангизни қучоқланг».

Тимоти Шаламе ва Никол Флендер

25 ёшда эканига қарамай, 40 дан ортиқ мукофотларни қўлга киритган ва 87 марта номзод бўлиб улгурган Тимоти кўрсатувлардан бирида онасига алоҳида миннатдорлик билдирган. «Мен у сабаб тирикман. Актёр бўлишимга ҳам айнан у сабабчи. Ойижон, мен сизни яхши кўраман!».

Жастин Тимберлейк ва Лин Бомар Харлесс

Жастин Тимберлейк эса онасини суперқаҳрамон она деб атайди. «Бу тентакона саёҳатда мени йўналтирадиган кучим эканингиз сабаб ҳам омадлиман. Менга кўп нарсани ўргатдингиз. Мен ўша дарсларнинг ҳар бирини қадрлайман. Сизни яхши кўраман, она».

Райан Рейнолдс ва Темми Рейнолдс

Райан Рейнолдс ҳатто тақдирлаш маросимларига ҳам онаси билан бирга келади. У ҳам бошқалар сингари Instagram саҳифасида онаси ҳақида алоҳида пост ёзиб қолдирган. «Мен онамни яхши кўраман. Менга уни ҳамма нарсага уриниб кўришга тайёрлиги ёқади. Бундан тахминан 4 ой аввал у мазкур мотоциклда энг яқин мактабдош дўстим билан сайр қилган».

Жаред Лето ва Констанс Лето

Жаред Летонинг онасига бўлган севгисини у таъкидлаган қисқа, аммо мазмунли жумладан ҳам билса бўлади: «Менга орзу қилишни ўргатганингиз учун раҳмат».

Дуэйн Жонсон ва Ата Жонсон

Актёрнинг 2015 йилдаги онаси билан суҳбати асосида ёзилган пости ижтимоий тармоқларда вирус каби тарқалганди. «Мен онамнинг рўпарасида ўтирибман. Тўсатдан у менга қараб, ўғлим, мен қандай яшаётганимга ишона олмаяпман… Буви ва буванг фахрланган бўларди, деди. Мен ундан бахтлимисиз, деб сўрадим. У бахтлиманми, аввал, бизга керакли маҳсулотни харид қила оламанми, деб хавотирланардим, энди эса шунчаки ўтирганимда нонушта келтириб беришади. Ҳа, ўғлим, бундан бахтлироқ бўлишим мумкин эмас, деб кўзларига ёш олди. Биласизми, ота-оналаримиз бизга бахтли эканини айтганда катта мамнуниятни ҳис қиламиз, демак, биз фарзандлар ҳаммасини тўғри қилган бўламиз».

Женнифер Гарнер ва Патрисия Энн Гарнер

Женифер ҳам онасини қанчалик яхши кўришини Instagram’да пост қилиб ёзиб билдирган. «Бетакрор, севимли ва таъсирчан онажоним Патрисия Инглиш Гарнерни туғилган куни билан табриклайман. Мен ҳам сиз каби жасур бўлишга умид қиламан. Биз сизни яхши кўрамиз ва такрор кўришишни интиқиб кутяпмиз».

Генри Кавилл ва Марианна Кавилл

Генри Равилнинг халқаро оналар кунига бағишлаб ёзган постидан онасини қанчалик яхши кўришини билса бўлади. «Ушбу постни мен билган улуғ аёлга бағишлайман. Бу менинг ҳайратомуз, кучли, иродали, ақлли, эътиборли ва ғамхўр онам. Тиззасидаги кичик болакай кўп нарсани, яхши инсон бўлишни айнан ундан ўрганган».

Жессика Бил ва Кимберли Бил

Онаси билан тушган суратни улашган Жессика унга қуйидагича изоҳ ёзиб қолдирган: «Фарзанд ва набираларига ҳар кимни, айниқса, аёлларни қўллаб-қувватлаш, севиш ва ҳурмат қилишни ўргатган гўзал онам шарафига».

Жессика Альба ва Кетрин Йенсен

Жессика ҳам онаси билан бирга тушган сурат остига: «Мен сени шунчалик яхши кўраманки! Сен ҳамиша ўзлигингча қоласан ва ҳеч қачон таслим бўлмайсан», — деб ёзиб қолдирган.

Хелли Берри ва Жудит Энн Хоукинс

2002 йил «Махлуқлар бали» фильми учун «Оскар» мукофотини олганда Холли онасига миннатдорлик билдирган. «Менга ҳар куни истаганимдек одам бўлиш ва бу орзу амалга ошишига ишониш учун куч берган онамга миннатдорлик билдирмоқчиман. Мен сизни шунчалик яхши кўраман, она».

Киану Ривз ва Патрисия Тэйлор

Киану онаси билан жуда ҳам яхши дўстона муносабатда. Буни уларнинг қизил йўлакдаги 2020 йилги суратларидан ҳам билса бўлади. Оммага камдан кам кўриниш берадиган Патрисия аксарият ҳолларда саҳна ортида қолади. Актёр эса муваффақиятли карьерасига онасининг ҳиссаси катта эканлигини таъкидлайди. «Жон Уик» фильмининг тақдимотида актёр онасига бағишлаб нутқ сўзлаган. «15 ёшимда онамдан актёр бўлсам бўладими, деб сўраганимда: Нима хоҳласанг, шуни қил, азизим, деб жавоб берган. Ҳаммаси шундай бошланган», — деган актёр.