KFC «Спенсер» фильмидан илҳомланиб малика Диананики сингари қизил жемперлар ишлаб чиқара бошлади

KFC’нинг Британиядаги филиалида малика Диананикига ўхшаш жун матосидан тикилган қизил жемперни сотувга чиқарди. Акция Кристен Стюарт иштирокидаги «Спенсер» драмаси экран юзини кўргани муносабати билан пайдо бўлган.

Диананинг жемперидаги «қўйлар»дан фарқли ўлароқ янги версияга товуқ принти туширилган — ундаги битта қорадан ташқари, ҳаммаси оқ рангда. Аллақачон KFC дўконларида сотувга чиқарилган жемперни фақатгина Буюк Британия аҳолиси сотиб олиши мумкин. Жемпернинг нархи — 34,99 фунт стерлинг (47 доллар)ни ташкил қилади.

5 ноябрь куни Лестер-скверда KFC таомномасидан Баргаин Баскет сотиб олган биринчи юз нафар харидорга жемпер совға қилиб берилган. Дастлаб бундай жемперлар 1970 йилларда Британиянинг Warm & Wonderful бренди томонидан ишлаб чиқарилган бўлиб, уларнинг ҳар бири қўлда тўқилган бўлган. 1990 йилларда тўхтатилган сотув, Эмма Коррин иштирокидаги «Тож» сериалининг тўртинчи фасли тақдимотидан кейин қайта тикланган. Аввалроқ «Спенсер» фильмининг илк расмий трейлери тақдим қилингани ҳақида хабар берилганди.