Хитойдаги энергетика инқирози 2022 йилда дунёда турли товарлар танқислиги юзага келиши билан таҳдид қилмоқда, натижада уларнинг нархи кўтарилиб кетади. Бу ҳақда Британиянинг The Times газетасида эълон қилинган мақолага таяниб, «Korrespondent.net» хабар берди.
Нашрнинг маълум қилишича, Хитойдаги кўплаб корхоналар сўнгги икки ҳафтада фаолиятини тўхтатишга мажбур бўлган. Ўн минглаб корхоналар эса ҳафтасига икки кунлик иш режимига ўтган ёки фаолиятини вақтинча тўхтатган.
Бу каби ҳолат мамлакатда фавқулодда даражада кўмирнинг етишмаётгани сабаб юзага келган, шу муносабат билан Хитойдаги 34 вилоятнинг 20 тасини ҳукумат электр энергия истеъмолига чекловлар киритган.
Гонконгдаги Robert Walters rekruting компанияси эксперти Жон Мюльэлининг сўзларига кўра, ҳозирда Хитойда товарлар ишлаб чиқаришга одатдагидан икки баробар кўпроқ вақт сарфланмоқда, яқин келажакда эса бу маҳсулотларни етказиб бериш занжирига таъсир кўрсатади, бозорда таклифнинг етишмаслигини юзага келтиради ва маҳсулотлар нархининг ошишига олиб келади.
Ўз навбатида Гонконгдаги ING банки таҳлилчилари Хитойдан маҳсулотларни етказиб беришдаги узилишлар 2022 йилнинг катта қисмида ҳам давом этиши мумкинлигини айтмоқда. Бу маҳсулотлар нархининг глобал кўламда 10-12 фоизга ошишига олиб келади.
Таъкидланишича, Хитойда кўмир етишмовчилигига асосан унинг қимматлашуви, ҳукуматнинг экологик вазиятни яхшилаш доирасида зарарли чиқиндиларни атмосферага чиқаришни қисқартириш борасидаги қарорлари, шунингдек, импорт етказиб беришлардаги узилишлар сабаб бўлмоқда.
Изоҳ (0)