Қашқадарё вилоятининг Нишон туманидаги 1-сонли давлат мактабгача таълим ташкилотида боғча мудираси ва ёрдамчи тарбиячи ўртасида бўлиб ўтган жанжал туман ИИБ назоратига олингани маълум бўлди.
«2021 йилнинг 1 ноябрь куни Нишон туманидаги 1-давлат мактабгача таълим ташкилоти мудираси И.Ф. ва мазкур мактабгача таълим ташкилотида ёрдамчи тарбиячи бўлиб ишловчи Г.Д. ўртасида аввалдан бўлиб келган низо туфайли тортишув юзага келган. Шу куни Г.Д. соат 10:30 ларда оила аъзоларини бошлаб келган. Оқибатда мактабгача таълим ташкилоти ҳовлисида, кириш эшиги ёнида мудира ва Г.Д.нинг оила аъзолари ўртасида келишмовчилик юзага келган.
Видеолавҳадаги ҳолат тан жароҳати ва жиноят аломатлари билан боғлиқлиги сабабли ҳозирда туман ички ишлар бўлими назоратида. Ушбу юзасидан тўлиқ маълумотлар суриштирув жараёнларидан сўнг маълум қилинади», — дейилади вилоят мактабгача таълим бошқармаси ахборот хизмати хабарида.
Қайд этилишича, вилоят мактабгача таълим бошқармаси томонидан тузилган ишчи гуруҳ ҳам ҳолатни ўрганишда давом этмоқда.
«Ушбу ҳолатнинг юзага келиш сабаблари, мактабгача таълим ташкилотидаги муҳит ва бошқалар хусусида ишчи гуруҳ хулосасига кўра маълум қилинади», — дейди бошқарма ахборот хизмати раҳбари Баҳодир Мусаев.
Қўшимча қилинишича, тарафларнинг айбдорлиги туман ИИБ суриштирув натижалари ва ишчи гуруҳ хулосасига кўра белгиланади.
Бундан аввал Тошкентдаги Magic City’да қўриқлаш ходимлари ва бир гуруҳ шахслар ўртасида жанжал содир бўлгани, Тошкентда бир гуруҳ шахслар ўртасида содир бўлган жанжал видеоси бўйича расмий маълумот берилгани ҳамда Тошкентда аёл Instagram’дан келган хабар сабаб жанжал кўтарган эрини пичоқлаб қўйгани ҳақида хабар берилганди.
Изоҳ (0)