Зеленский 1943 йилда Киевнинг фашистлардан озод этилишини СССР шафқатсизлигининг тарихи деб атади

Украина президенти Владимир Зеленский 1943 йилда Киевнинг фашистлардан озод этилишини ёдга олар экан, Собиқ Иттифоқ раҳбарияти йўқотишлар статистикасини етарлича баҳолашни истамагани учун уларни шафқатсизлик ва бефарқликда айблади. Бу ҳақда Зеленский Telegram’да ёзган.

Зеленскийнинг сўзларига кўра, талафотлар статистикасини ёмонлаштирмаслик учун одамлар ҳарбий амалиётга дала ҳарбий хизматга чақирув бўлимлари орқали сафарбар қилинган, улар ҳарбийлар рўйхатга киритилмаган». Шунингдек, Зеленскийнинг айтишича, улар «ўта ёмон қуролланган».

Унинг таъкидлашича, расмий маълумотларда Днепр учун кечган жангда 417 минг киши ҳалок бўлгани айтилган бўлса, бир қатор тарихчиларнинг тадқиқотлари ва ҳисоб-китоблари аслида бу рақам икки баробар кўп эканини исботлайди. Киев учун жангларда 240 минггача одам ҳалок бўлган, дея қўшимча қилди Зеленский.

Президентнинг таъкидлашича, ҳалок бўлганлар орасида Украинада урушга сафарбар қилиниб, ҳарбий формасиз жанг қилган, тайёргарликдан ўтмаган ва ёмон қуролланган эркин фуқаролар кўп эди. Унинг сўзларига кўра, улар «очиқдан-очиқ ўлимга» юборилган.

Украина президентининг таъкидлашича, ҳақиқий давлат учун инсон ҳаёти энг олий қадрият, «жонсиз машина» учун эса инсон «фақат ёқилғи» ва ресурсидир.

Бундай машинага ярим миллион одамнинг ўлими сезилмаслиги мумкин, дея қўшимча қилди Зеленский. «У бундай даҳшатли нархни осонгина тўлашга тайёр, чунки раҳбариятнинг хархашаси бор — Октябрь инқилоби йиллигига қадар Киевни озод қилиш», — дея хулоса қилди Украина президенти.

«1943 йил 6 ноябрда Украина пойтахти фашист босқинчиларидан қандай нарх эвазига озод қилинганини ҳеч қачон унутмаймиз. Киевнинг озод этилиши — бу катта раҳбарларнинг чексиз бефарқлиги ва шафқатсизлиги ҳамда шаҳарни фашистлардан озод қилган буюк жангчиларнинг чексиз жасорати тарихидир», — деб ёзган Зеленский Telegram’да.

Октябрь ойида Украина Миллий хавфсизлик ва мудофаа кенгаши «Улуғ Ватан уруши» атамасидан воз кечиб, уни «Иккинчи жаҳон уруши» ва «Совет-Герман уруши» атамалари билан алмаштиришни таклиф қилди.

Бу ўзгаришлар «Қрим ва Донбасс вилоятларининг босиб олиниши муносабати билан» фойдаланиш учун тавсия этилган номлар ва атамалар луғатига киритилди. Ҳозир «Улуғ ватан уруши» атамаси луғатда «фейк/ клише» сифатида келтирилган.

1943 йил 24 августдан 23 сентябргача Днепр учун кечган жангда Совет қўшинлари Украинанинг ўнг қирғоғи ҳудудида бир нечта кўприкларни эгаллаб олишга муваффақ бўлган. Киев ҳужуми операцияси 1943 йил 3 ноябрдан 13 ноябргача олиб борилган, натижада Киев (6 ноябрь) ва Житомир (13 ноябрь) фашистлардан озод қилинган.