Канадада қишлоқ хўжалиги вазири ичкиликбозлик сабаб истеъфога чиқди

Канадада Альберта провинциясининг ўрмон ва қишлоқ хўжалиги вазири Девин Дришен спиртли ичимликлар билан боғлиқ муаммолар туфайли истеъфога чиқди. Бу ҳақда унинг ўзи 8 ноябрь куни Facebook’да маълум қилди.

«Мен Альберта бош вазири Жейсон Кеннига истеъфога чиқишим тўғрисидаги хатни топширдим ва у қабул қилинди. Алкоголга нисбатан шахсий хатти-ҳаракатларим бутун ҳукумат учун муаммога айланганини тан оламан», — деб ёзади Дришен.

Шунингдек, собиқ вазир ушбу воқеадан чуқур афсусда эканини билдирган.

«Бироқ истеъфога чиқиб, шахсий саломатлик ва фаровонликка эътибор қаратиш ҳам ўзим, ҳам провинция учун яхшироқ бўлади деган қарорга келдим», — дея қўшимча қилган Дришен.

CBC News аноним манбаларга таяниб Дришен провинция парламентидаги кабинетида камида ўн марта спиртли ичимлик ичгани ҳақида хабар берганди. Шу билан бирга, унинг кабинети эшиги бегоналар учун ёпиқ бўлиб, одамлар фақат код сўзларни айтиш орқали ичкарига кириши мумкин бўлган.

Аввалроқ Канада бош вазири Жастин Трюдо Вазирлар Маҳкамаси таркибини янгилаган эди. Хусусан, Ташқи ишлар вазирлиги ва Мудофаа вазирлиги бошқаруви аёлларга — мос равишда Мелани Жоли ва Анита Анандга топширилган. Эндиликда Трюдо ҳукуматининг ярмини аёллар ташкил қилмоқда.