Ироқ разведка бўлинмалари мамлакат ғарбидаги Анбар вилояти чўлида ИШИД етакчиларидан бирини йўқ қилди. Бу ҳақда Ироқ Қуролли кучлари қўмондони вакили Яҳё Расулга таяниб, «ТАСС» хабар берди.
Яҳё Расулнинг маълум қилишича, Анбар вилоятидаги Эр-Рутба чўлида жойлашган Ал-Казаф ва Жалабат водийларида махсус операция ўтказилган. ИШИД тўдаларининг мағлубиятидан сўнг, қочишга улгурмаган етакчилардан бири Абу ал-Бараа Ироқ разведка ходимлари томонидан йўқ қилинган. Бундан ташқари, хавфсизлик кучлари радикалларнинг учта бошпанасини вайрон қилган.
ИШИД жангарилари 2014 йилнинг ёзида Ироқ ҳудудининг учдан бир қисмини эгаллаб олган эди. Ўша йилнинг июнь ойида улар мамлакатнинг иккинчи йирик шаҳри Мосулни эгаллаб, уни халифалик деб аталган давлатнинг пойтахти деб эълон қилди. 2015 йилда халқаро коалиция кўмагида Ироқ ҳукумат кучлари ИШИД томонидан босиб олинган ҳудудларни озод қилиш бўйича кенг кўламли кампания бошлади. 2017 йилнинг декабрида Ироқнинг ўша пайтдаги бош вазири Ҳайдар ал-Ободий ИШИДнинг якуний мағлубиятини эълон қилган.
Бироқ хавфсизлик кучлари мамлакатнинг турли ҳудудларида ҳуқуқ-тартибот идоралари ходимлари, армия ва тинч аҳоли вакилларига ҳужумлар уюштираётган террорчиларни йўқ қилиш бўйича операцияларни давом эттирмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)