Кўп ҳолларда боланинг боши тунги уйқу пайтида терлаши табиий жараён ҳисобланади. Ҳаётининг бошланғич даврида чақалоқлар куннинг исталган қисмида кўп терлаши мумкин. Бу ҳолат норма ҳисобланади, чунки уларда тананинг терморегуляцияси тўлиқ ривожланмаган.
Чақалоқларнинг боши овқатланиш, ухлаш, ўйнаш пайтида жуда кўп терлайди. Янги туғилган чақалоқларда тер безлари 2-3 ҳафталикдан бошлаб фаол ишлай бошлайди, улар, асосан, бош, оёқ ва қўл кафтлари соҳасида тўпланган. Ҳаётининг иккинчи йилидан бошлаб тер безлари фаолроқ ишлай бошлайди ва ўртача тўрт ёшида тўлиқ ривожланишга эришади, шу туфайли гўдаклар ташқи муҳит ҳароратининг кўтарилишига, тананинг ҳаддан ташқари қизиб кетишини камайтириш учун кўп терлайди.
Чақалоқларнинг уйқусида бошининг терлаши овқатланишдан кейин сўрғич билан ухлаб қолганда ҳам кузатилади. Кўкрак сути ёки сўрғич учун чақалоқлар катта жисмоний куч ишлатади. Шунингдек, сочлар қуюқ ва қалин бўлиши уйқу вақтида бош терисининг ҳаддан ташқари исиб кетишига ва терлашига сабаб бўлади.
Шунингдек, жуда иссиқ кийимлар, синтетик матолардан фойдаланиш, хонанинг юқори ҳарорати, ҳаво алмашинувининг етишмаслиги терлашнинг ортишига олиб келади. Уч ёшгача бўлган болаларда тер безларининг ишлаши асаб тизимининг ҳолатига ва тананинг ўсишига боғлиқ. Вазни оғир ёки ортиқ бўлган болаларда асаб тизими қўзғалувчанлиги юқори бўлади ва уларда уйқу пайтида ортиқча терлаш тез-тез кузатилади. Ёши катталашган сари терморегуляция жараёни шаклланади ва терлаш ўз-ўзидан йўқолиб кетади.
Бундан ташқари терлаш қуйидаги касалликлар аломати бўлиши мумкин:
Рахит
Овқатлантириш пайтида чақалоқнинг юзида йирик тер томчилари аниқ кўринади, кечаси боши кучли терлайди, айниқса, бошининг орқа қисми, эрталаб унинг ёстиқчаси нам бўлади. Сочлари бошининг орқа қисмида кўп тўкилади, боши қичишади, бола инжиқ бўлиб қолади, иштаҳаси йўқолади, оддий товушлар ва ҳаракатлардан чўчийди.
Юрак-қон томир касалликлари
Кўп терлашдан ташқари, овқатланиш пайтида нафас олиши қийинлашади, лаблар ва бурун атрофи териси озгина кўкиш рангга киради. Бола кучсиз, нимжон ва ўсиши сустлашади.
Шамоллаш
Вирусли ёки бактериал инфекция юқтириб олинганда кўп терлаш, тана ҳарорати кўтарилиши, бурун оқиши ва битиши, йўтал, ич кетиши кузатилади. Касалликни ўтказиб юбормаслик мақсадида боланинг боши кўп терлаганда, албатта, шифокор билан маслаҳатлашиш тавсия этилади.
Шифокор Хуршид Аъзамхўжаев тавсиялари асосида тайёрланди.
Изоҳ (0)