Умуртқа поғонасида муаммо бор-йўқлигини уй шароитида аниқлашга ёрдам берадиган тавсиялар

Жароҳатлар, стресс, ортиқча вазн ва нотўғри овқатланиш, кун бўйи компьютерда ишлаш ёки аксинча, узоқ вақт туриш умуртқа поғонасига салбий таъсир қилади ва оғриқни келтириб чиқаради. Британия қироллик оиласининг саломатлигини узоқ йиллардан буён кузатиб келаётган доктор Мосараф Али ўз-ўзини ташхислашнинг оддий ва самарали усуллари билан бўлишди.

1. Тўпиқ, тизза, тос суяги ва елка бўшашган ҳолда гилам устида ётилади. Энг қулай ҳолатни топиш учун бироз ҳаракат қилиш лозим. Кейин чуқур нафас олиб, чиқаришни бошлаш керак. Агар бўшашган ва чўзилган мушакларга қарамай, бел, орқа ёки бўйин қисмида кучланиш ҳис қилинса, бу соҳада ҳаммаси яхши эмаслигидан дарак берувчи муаммо мавжуд.
2. Бошланғич позиция бир хил. Орқа чапга бурилади, шунда бурун чап елкага тўғри келади. Орқани иложи борича буришга ҳаракат қилиш лозим. Агар қулоқ полга тегмаса, яъни қандайдир оғриқ буни қилишга халақит берса,  умуртқа поғонасининг чап томони ва чурра билан боғлиқ муаммолар бор. Балки ўнг томонда жойлашган мушаклар ёки лигаментлар таранглиги ҳаракатга халақит бераётган бўлиши мумкин. Синовни бошқа йўл билан такрорлаш тавсия этилади.
3. Бошланғич позиция ўзгармайди. Бўйин секин кўтарилади ва ияк кўкракка яқинлаштирилади. Агар оғриқли ҳислар пайдо бўлса, бу муаммо мавжудлигини кўрсатади. Муҳими,  оғриқ қаерда кўпроқ кузатилаётганини аниқлаш керак.
4. Бошланғич позиция бир хил. Тиззалар эгилиб, тўпиқлар орқага тортилади. Оёқлар бўкса кенглигида очилади. Бир текис нафас олинади. Тиззалар навбатма-навбат чапга ва ўнгга букилади.  Оёқ бутунлай ерга ётиши керак, агар тиззалар қандайдир сабабга кўра полга тегмаса, бу бел соҳасида муаммо борлигини кўрсатади.
5. Ерга ётиб, оёқлар чўзилади. Ўнг оёқ тиззани эгмасдан кўтарилади. Уни иложи борича юқорига кўтаришда давом этиш керак. Агар тўғри бурчакка эришилса, бу тос суяги ва пастки орқа томондан ҳамма нарса тартибда эканлигини англатади. Агар натижа бундай бўлмаса, унда мушакларнинг спазмлари мавжуд бўлиб, бу ҳаракатни амалга оширишга тўсқинлик қилади. Чап оёқ учун тестни такрорланг.
6. Қўллар олдинга чўзилган ҳолда тик турилади. Тиззалар букилмасдан, қўл билан оёқ бармоқларига тегинишга ҳаракат қилинг, тана тахминан 60 даража эгилиши керак. Агар ўн сантиметр етмаса ҳам, ҳамма нарса тартибда. Аммо қўл ва оёқ бармоқлари орасидаги масофа каттароқ бўлса, бел билан боғлиқ муаммо борлиги аниқ.
7. Кафтлар кўкракда бирлаштирилиб, тик турилади. Тана ён томонга айлантирилади, тос суяги ҳаракатсиз ушлаб турилади. 90 даражага бурилиш имкони бўлмаса, қайси соҳадаги оғриқ бурилишга тўсқинлик қилаётганини аниқлашга ҳаракат қилиш лозим.
8. Секин-аста бўйин тананинг марказий чизиғи атрофида иккала йўналишда айлантирилади. Агар товушлар эшитилса, улар тўхтагунча ҳаракатни давом эттириш керак. Бордию, бош айланса, бу ҳам муаммодан дарак беради. Соғлом одамда ҳеч қандай овоз ва бош айланиш кузатилмайди.
9. Тик турилади ва бир неча марта йўталиб кўрилади. Агар белда оғриқ пайдо бўлса, бу соҳага эътибор қаратиш керак.