Парҳезшунослар ва ЖССТ мутахассислари бўтқаларнинг фойдали ёки ундай эмаслиги ҳақида турли фикр билдиради. Баъзилар ушбу маҳсулотда углевод бисёрлигини маълум қилса, бошқалар фойданинг кони эканлигини таъкидлайди.
Фанда эса бўтқа чиндан ҳам фойдали бўлиши учун ёрмалар бутун ҳамда кам миқдорда қайта ишланган бўлиши кераклиги айтилади. Бўтқалар организм учун зарур бўлган ва очлик ҳиссини қондирадиган витамин, минерал, шунингдек, секин ҳазм бўладиган углеводларнинг манбайидир.
Энг фойдали бўтқа қайси?
Мутахассислар гречканинг саломатлик ва организм учун фойдалигини таъкидлайди. Унда ошқозон-ичак тракти учун фойдали бўлган ҳамда узоқ вақт давомида қоринни тўқ тутиш хусусиятига эга бўлган клетчаткалар сероб. Шу сабаб ҳам бир тарелка гречка билан нонушта қилгандан кейин узоқ вақт давомида очлик безовта қилмайди. Бундан ташқари, гречка ўсимлик оқсили мўл бўлган маҳсулотлар орасида рекордсмен саналади. Оқсилининг сифатли экани сабаб спортчилар ва вегатерианлар ушбу маҳсулотни тез-тез истеъмол қилади.
Гречка бошқа ёрмаларга нисбатан минералларга бойдир. Унда марганец, мис, магний, темир ҳамда фосфор бисёр. Ушбу минераллар организмдаги барча аъзоларнинг фаолияти учун муҳим. Темир ва мис юрак-саломатлиги, магний асаб тизими ва когнитив қобилиятлар, фосфор ва марганец эса моддалар алмашинуви, тўқималар регенерацияси учун аҳамиятли.
Қолаверса, гречка ҳужайраларни шикастланишдан ҳимоя қиладиган, яллиғланиш жараёнларининг ривожланишини олдини оладиган, қолаверса қариш жараёнини секинлаштириб, тери аҳволини яхшилайдиган антиоксидантларнинг ҳам кони. Аммо бу фақат гречка истеъмол қилиш кераклигини билдирмайди. Рационнинг балансли ва ранг-баранг бўлиши муҳимлигини эсдан чиқармаслик керак.
Мавзуга доир:
- Ширинликлар билан парҳез: Вазн ташлаётганда нималар билан тамадди қилса бўлади?
- Тез озмоқчисиз? Бундай қилмаслик учун 9 сабаб
- Маде ин Жапан: Японча парҳез нима ва унга амал қилиш орқали қандай натижага эришиш мумкин?
- Самарали парҳез: Хонанда Адел қандай қилиб гречка ёрдамида 40 кило вазн ташлашга эришди?
Изоҳ (0)