Беларусь Telegram каналларида 8 ноябрь куни Польша чегараси томон ҳаракатланаётган қочқинлар карвонини акс эттирувчи видеотасвирлар эълон қилинди, деб ёзади Meduza.
«Спутник Беларусь» хабарига кўра, муҳожирлар Беларуснинг Гродно вилоятидаги «Брузги» чегара пунктига йўл олган. «Варшавская русалка» Telegram канали карвонда Польша орқали Германияга ўтиб олишга умид қилаётган курд қочқинлари борлигини ёзди. «РИА-Новости» Беларусь чегарачиларига таяниб, хабар беришича, чегара ёнига мингдан ортиқ одам кўчиб келган.
Гродно вилояти ички ишлар бошқармасида маълум қилинишича, қочоқлар буюмлари билан Польша чегарасига кўчиб келгани муносабати билан полиция томонидан ҳуқуқ-тартиботни таъминлаш чоралари кўрилмоқда. Беларусь Давлат чегара қўмитаси муҳожирлар колоннаси Польша билан чегара томон йўл олганини тасдиқлади ҳамда шу сабабли Беларусь чегарачилари «ўтказиш пунктларида кучайтирилган режимда хизмат қилаётганини» қўшимча қилди. «Спутник Беларусь»нинг хабар беришича, мамлакат ички қўшинларидаги ҳарбий хизматчилар Беларусь чегарасини мустаҳкамлаш учун етиб келган.
Польша разведка хизматлари вазир-координатори Станислав Жарин Twitter’да «тревогага етакловчи маълумотлар« тарқалаётгани ҳақида ёзди. У чегарани кенг миқиёсда кесиб ўтишга уриниш учун тайёргарлик кўрилаётганини қўшимча қилди.
Польша ташқи ишлар вазири ўринбосари Пётр Вавжик, ўз навбатида, «Польша радиоси» эфирида чегарани ноқонуний кесиб ўтишга бўлган ҳар қандай уринишлар дарҳол тўхтатилишини айтди. Вавжик, шунингдек, Беларусь ҳукуматини вазиятни кескинлаштиришга уринишда айблади, унинг сўзларига кўра, бу қурбонлар бўлишига олиб келиши мумкин.
Мавзуга доир:
Изоҳ (0)