Навоий вилояти ҳокими Қобул Турсунов вазифасидан озод этилгани ҳақида хабар берилганди. Вилоят ҳокимлиги матбуот хизматининг хабар қилишича собиқ ҳоким ўз аризасига кўра лавозимидан олинган.

Қайд этилишича, 8 ноябрь куни Навоий вилояти ҳокими мажлислар залида фаоллар йиғилиши бўлиб ўтган.

Йиғилишда Ўзбекистон Президенти Администрацияси раҳбари Зайнилобиддин Низомиддинов, Ўзбекистон бош вазирининг биринчи ўринбосари Очилбой Раматов, вилоят ҳокими ўринбосарлари, вилоят, шаҳар ва туманлар секторлар раҳбарлари, халқ депутатлари Навоий вилояти Кенгаши депутатлари, Сенат аъзолари, вилоят бошқарма ва ташкилотлари раҳбарлари ҳамда оммавий ахборот воситалари вакиллари иштирок этган.

Йиғилишда ташкилий масала кўриб чиқилган.

Ўзбекистон Президенти Администрацияси раҳбари Зайнилобиддин Низомиддинов Президент фармонлари билан йиғилиш иштирокчиларини таништирган. Вилоят ҳокими Қобул Турсунов соғлиғи даволаниш талаб этгани сабабли ўз аризасига мувофиқ вазифасидан озод этилган.

Шу вақтга қадар Тошкент шаҳар Давлат солиқ бошқармаси бошлиғи лавозимида фаолият юритиб келган Нормат Турсунов Навоий вилояти ҳокими вазифасини бажарувчи этиб тайинланди.