Таниқли ёзувчи Улуғбек Ҳамдам Facebook’даги саҳифаси орқали Тошкент вилояти Нурафшон шаҳрида Зулфия Зокирова номига ҳайкал мажмуасини қуришга 28,4 миллиард сўм ажратилгани тўғрисида тарқалган хабарлар юзасидан фикр билдирди.
У «Уйида чакса уни йўқ, том бошида қўш тандир» мақолини мисол сифатида келтириб, амалдорлар шундан хулоса чиқариб иш кўрса, Ўзбекистон гулистонга айланиб кетишини ёзган.
Оҳ, менинг доно халқим! Кўпни кўрган донишмандим!!!Тошкент вилояти ҳокимининг фармойишига кўра, Нурафшон шаҳрида Зулфия Зокирова номига ҳайкал мажмуасини қуриш ва атрофини ободонлаштириш ишлари учун 28,4 миллиард сўм ажратилгани тўғрисида хабар берилганди. Шунингдек, Нурафшон Business City ҳудудида замонавий кутубхона биносининг қурилиши учун 6 миллиард сўм маблағ ажратилиши кўзда тутилган.Қани энди бу, худойим тўғри йўлга солгур айрим амалдорларимиз сенинг мақолларинг мағзини чақиб, улардан хулоса чиқариб яшаса-ю, юртимиз гулистонга айланса!..
Ўзбекистонда Зулфия опа қисматини ёритиб бергувчи яхши бир фильм ишланди. Элнинг эътибори қаратилди, дуолар қилинди. Мамлакатнинг ҳозирги ҳолида бир инсон қисматига шу эътиборнинг ўзи жуда катта яхшилик! Бу ишнинг яхшилик эканини айтдик, мана, яна айтяпмиз.
Тағин эътибор кўрсатмоқчи бўлсаларинг, отангизга боз раҳмат, деймиз. Лекин ҳар бир нарсанинг ўз ўрни, йўриғи, меъёри, усули бор ахир. Одамларимиз топиб айтаётганидек, ана, ўша регионга керакли шифохонами, мактабми қуриб, опанинг номи билан атанглар!
«Менинг ота-онам ‘Зулфия шифохонаси’да даволаниб чиқишди, шифохонамисан шифохона, дўхтирлари зўр! Барака топишсин! ‘Зулфия’га боринглар, ‘Зулфия’га!», ёки «Менинг ўғлим ‘Зулфия’да ўқиди-да, ўшанчун институтларга кириб кетди.
Ўқитувчиларига балли. Сиз ҳам қизингизни «Зулфия мактаби»га беринг, айланай!», дея эл-юрт гапирса, дуолар қилса, қанчалар яхши. Дуо Зулфия опа ва унинг ўғилларига борса, шифохона-ю мактабдан келган фойда элга тегади. Ёки йўқми?!.. Яҳудийларнинг «пул топишдан олдин уни сарфлашни ўрган!» деган бир мақоли бор.
Биз топган ёки қарз олган пулимизни ҳашам-у тўйга, ҳайкал-у бетон биноларга сарфлаб, келажак деган дарахтнинг илдизига болта уряпмиз, ҳа! 100 йил бурун шуни айтиб, жадид боболаримиз куйиб-ёниб кетишганди.
Ҳозирда халқимизнинг асосий қисми ўртачадан ҳам пастроқ, яъни уйида чакса унсиз ҳолда кун кўраётган бир пайтда битта ҳайкалга халқнинг пулидан шунча маблағ (28 миллиард сўм-а!) ажратиш томбошига қўштандир ўрнатиш деганидир. Халқ уйини, омборини унга тўлдириб қўйинг, кейин қўштандир нима бўпти, мингтандир қуринг, ярашади. Акс ҳолда... акс ҳолда, кўпчилик айтаётганидек, «пул ювиш операцияси» деган тамғадан қочиб қутулиб бўлмайди.
Улуғбек Ҳамдам, ёзувчи
Умумий қиймати 34,4 миллиард сўм бўлган (8 ноябрдаги Марказий банк курси бўйича 3,2 миллион доллар) маблағлар вилоят маҳаллий бюджетининг 2021 йил III чорак якуни билан шаклланган даромадлар режасининг орттириб бажарилган қисми ҳисобидан ажратилади.
Вилоят ҳокимлиги ушбу режалаштирилаётган харажатларнинг асослиги бўйича жамоатчиликдан келиб тушган саволларга жавобан маълумот берган бўлиб, унда бўлажак мемориал мажмуа 2,97 гектар ҳудудда парк, ўйин ва пикник майдонлари, амфитеатр, терассали ва ёпиқ турдаги кафелар, фавворалар, ташриф буюрувчилар учун қулай ўриндиқлар ва яшил ҳудудлар, пиёдалар ва велосипедчилар учун қулай йўлаклар, болалар майдончаларини ўз ичига олиши айтилган.
Хабарда таъкидланишича, мемориал мажмуани қуриш ташаббусини Президент Шавкат Мирзиёев 16 октябрь куни вилоятдаги сайловчилари билан учрашув давомида кўплаб таклифлар қаторида билдирган.
Вилоят маъмуриятининг маълумотларига кўра, тендерда ғолиб чиққан қурилиш компанияси, айни вақтда лойиҳалаш ишлари билан шуғулланмоқда.
«Gazeta.uz»нинг ҳокимликдан аниқлик киритиб ёзишича, лойиҳани 2007 йилнинг апрелида Қаршида рўйхатдан ўтказилган Қашқадарё Макс Сервис Қурилиш хусусий корхонаси амалга оширади. Компаниянинг ягона таъсисчиси сифатида Маҳфират Шодиевна Бойматова кўрсатилган, раҳбар — Баҳодир Шокир ўғли Йўлдошев.
Маблағ ёрдамида 1,1 гектар ер майдонида замонавий 3 қаватли кутубхона қурилиши режалаштирилган бўлиб, иншоот функционал зоналар ва компьютер ускуналари билан жиҳозланади. Интернет, ахборот ресурслари ва миллий электрон кутубхонадан фойдаланиш имконияти яратилади.
«Давлат раҳбари ташаббуси билан қурилиши режалаштирилган ушбу иншоотлар вилоят аҳолиси, ёшлари ва меҳмонлари учун нафақат мароқли ҳордиқ чиқариш, балки маънавий-ахлоқий қадриятларни юксалтириш йўлида ҳам муҳим қадам бўлади», — дейилади ҳокимлик хабарида.
«Ҳурматли журналист ва блогерларимиздан бу мавзудаги ахборотни тарқатишда тафсилотларга эътибор қаратишларини сўраймиз. Қурилиш ишларининг бориши ва унга сарфланаётган маблағлар ҳақида жамоатчиликка қўшимча ахборот бериб борилади», — дея таъкидланади хабарда.
Маълумот учун, Зулфия Зокирова Иккинчи Жаҳон урушида бешта ўғлини йўқотган она ҳисобланади. Зулфия Зокирова тақдири акс этган «Илҳақ» фильми суратга олинган. Тошкентдаги ғалаба боғида илк ҳайкали ўрнатилган.
Изоҳ (0)