Германия канцлери вазифасини бажарувчи Ангела Меркель лавозимидан кетгач, нима билан шуғулланиши бўйича бирор аниқ режаси йўқлигини, аммо сиёсат билан бошқа шуғулланмаслигини маълум қилди, деб хабар беради «РБК».
«Мен сиёсий можароларни ҳал этмайман — бу билан узоқ йиллар шуғулландим: 16 йил федерал канцлер лавозимида, мамнуният билан Европа Иттифоқида, халқаро даражада доим мултилатерализм билан чиқдим. Ҳозир эса истеъфодан кейин нима билан шуғулланишимни билмайман. Олдин ҳам айтганман: аввалига бироз дам оламан, кейин эса хаёлимга нима келишини кўрамиз», — дейди у Deutsche Welle’га берган интервьюсида.
Шу билан бирга, Меркель нафақага чиққан «ўқиш ва ухлаш» ниятида экани тўғрисидаги сўзларини яна тасдиқлаган.
«Ўйлайманки, кейинроқ бошимга бошқа режалар келади. Шунчаки узоқ йиллар давомида бор диққатимни менга берилган кун тартибига қаратдим ва доим тайёр туришимга тўғри келди. Ҳукумат раҳбарининг асосий вазифаларидан бири нимадир содир бўлса, зудлик билан чора кўришдан иборат. Ҳозир эса нима қилишни хоҳлашимни кўриб чиқаман», — дейди Меркель. Унинг сўзларига кўра, бунга тахминан икки ой талаб этилади.
Эслатиб ўтамиз, 27 сентябрь куни бўлиб ўтган Германиядаги парламент сайловларида амалдаги молия вазири Олаф Шолс раҳбарлигидаги Социал-демократик партия (ГСДП) ғалаба қозонди. Унга сайловчиларнинг 25,7 фоизи овоз берди, ушбу натижага мувофиқ у янги Бундестагда 206 та ўринга эга бўлади.
Сайлов якунларига кўра, Ангела Меркель канцлер лавозимини тарк этади. У ҳукумат раҳбарлигини ўз ихтиёри билан топширишга ва сайловларда қатнашмасликка қарор қилганди.
Изоҳ (0)