Марказий Америкадаги Никарагуа давлатида 7 ноябрь, якшанба куни умумий сайловлар бўлиб ўтди. 6,5 миллионлик аҳолига эга мамлакатда 4,5 миллиондан ортиқ сайловчилар президент, вице-президент, Никарагуа Миллий ассамблеяси (бир палатали парламент) ва Марказий Америка парламенти депутатлари учун овоз берди.
Овоз бериш жараёнига сайловда иштирок этаётган барча сиёсий кучларнинг назоратчилари ҳамда Россия, Абхазия, Жанубий Осетия, АҚШ, Буюк Британия, Германия, Испания, Франция ва Лотин Америкаси давлатларидан 200 дан ортиқ мустақил кузатувчилар ҳамроҳлик қилди.
Россия Федерацияси, Абхазия ва Жанубий Осетиядан келган кузатувчилар фуқароларнинг сайлов жараёнида фаол иштирок этганини қайд этди. Уларнинг сўзларига кўра, овоз беришда жиддий қонунбузарлик ҳолатлари аниқланмаган. Сайловлар коронавирус пандемияси шароитида тинч ва эпидемиологик талабларга риоя қилган ҳолда ўтган. Овоз бериш марказларига кираверишда қўллар дезинфекция қилиниб, кексалар, ҳомиладор аёлларнинг кириши осонлаштирилган – уларга навбатсиз овоз беришга рухсат берилган, ногиронларнинг сайлов участкаси бўйлаб ҳаракатланишига ёрдам кўрсатилган.
Овоз бериш жараёни хавфсизлигини 30 мингга яқин махсус тайёргарликдан ўтган полиция ходимлари, шунингдек, ҳарбий хизматчилар таъминлаган. Сайлов участкаларида ва сайлов участкалари яқинида жиддий ҳодисалар кузатилмаган.
Сайлов иштирокчилари
Сайловлар ҳокимият партияси — «Сандиниста миллий озодлик фронти» бошчилигидаги бошқа олтита сиёсий партия альянси томонидан ўтказилди. Хусусан, ушбу партиялар — Либерал конституциявий партия, Никарагуа христиан йўли партияси, «Либерал Никарагуа альянси», «Республика учун альянс», Мустақил либерал партия, шунингдек, фақат Никарагуа Кариб денгизи соҳилидаги автоном вилоятлардан Миллий Ассамблея депутатлигига номзодлар кўрсатадиган «ЯТАМА» ҳудудий партияси. Никарагуа қонунчилигидаги сўнгги ўзгаришларга кўра, бир партиядан мамлакат президентлиги ва вице-президенти лавозимига номзод сифатида турли жинсдаги шахслар кўрсатилиб, барча номзодлар рўйхатида аёллар ва эркаклар тенг даражада вакиллик қилмоқда.
Энг кўп овоз тўплаган партиядан номзодлар 5 йил муддатга Никарагуа президенти ва вице-президенти этиб сайланади. Маҳаллий социология агентлигининг прогнозларига кўра, мамлакатнинг амалдаги юқори лавозимли амалдорлари — президент Даниэль Ортега ва унинг рафиқаси, вице-президент Росарио Мурилио ғалаба қозониш учун энг катта имкониятларга эга.
АҚШ президенти Жо Байден ўзининг ёзма баёнотида Никарагуада ўтган сайловларни танқид қилди. Унга кўра, Никарагуада ўтказилган президентлик ва парламент сайловлари демократик стандартларга тўғри келмайди, улар «на эркин ва на адолатли» ўтган.
Америка етакчисининг фикрича, овоз бериш саҳналаштирилган. «Бугун Никарагуа президенти Даниэль Ортега ва унинг рафиқаси, вице-президент Росарио Мурилио саҳналаштирган жараён пантомима эди», — дейилади Байденнинг баёнотида.
«Биз Ортега ва Мурилио режимини Никарагуада демократияни тиклаш бўйича зудлик билан чоралар кўришга, ҳуқуқбузарликларга қарши чиққани ва никарагуаликларнинг адолатли сайловларда овоз бериш ҳуқуқини ҳимоя қилгани учун ноҳақ қамоққа олинган маҳбусларни дарҳол ва сўзсиз озод қилишга чақирамиз. Бу талаблар бажарилмас экан, АҚШ халқаро ҳамжамиятнинг бошқа аъзолари билан яқин ҳамкорликда Никарагуа халқини қўллаб-қувватлаш, Ортега ва Мурилло ҳукуматларини ҳамда ҳокимиятнинг суиистеъмол қилинишига ҳисса қўшганларни жавобгарликка тортиш учун қўлидаги барча дипломатик ва иқтисодий воситалардан фойдаланади», — деди Байден.
Изоҳ (0)