АҚШ президенти Жо Байден Ироқдаги терактни қоралади. У мамлакат бош вазири Мустафо ал-Казимийнинг қароргоҳига дронлар ёрдамида амалга оширилган ҳужум текширувига ёрдам кўрсатиш бўйича топшириқ берди, деб хабар беради «Коммерсантъ».
Эслатиб ўтамиз, 7 ноябрь куни Ироқ пойтахти Бағдодда портловчи модда ўрнатилган учувчисиз учар аппарат мамлакат бош вазири Мустафо ал-Казимий қароргоҳига ҳужум қилганди. Бино Ироқ пойтахтининг ҳукумат бинолари ва хорижий элчихоналарни ўз ичига олган «яшил зонаси»да жойлашган. Ҳарбийлар портлаш билан якунланган ҳужумни бош вазирга суиқасд деб атаган, бироқ уни ўз вақтида эвакуация қилишга муваффақ бўлган.
Reuters хабарига кўра, Ироқ бош вазири қароргоҳига ҳужум парламент сайловлари натижаларидан норози намойишчилар ва ҳуқуқ-тартибот ходимлари ўртасидаги тўқнашувлар фонида содир бўлган (сайлов 10 октябрь куни бўлиб ўтган, Олий сайлов комиссияси якуний натижаларни ҳали эълон қилгани йўқ). 5 ноябрь куни Бағдоднинг «яшил зонаси»да рўй берган тартибсизликлар натижасида 120 дан ортиқ киши жароҳатлангани хабар қилинганди. Намойишчилар полицияга тош отган, полиция эса ўз навбатида ҳавога ўқ узиш билан жавоб қайтарган.
Изоҳ (0)