Олий Мажлис Сенатининг янги биносида Президентликка сайланган Шавкат Мирзиёевнинг инаугурация маросими бўлиб ўтмоқда. Президент сифатида қасамёд қабул қилган Шавкат Мирзиёев уй-жой масаласини ҳал этиш, аҳолига қулай яшаш шароитларини яратиш масаласи ҳақида гапирди, деб хабар беради «Дарё» мухбири.
Президент аҳоли бандлигини таъминлаш, ёшлар ва ишсиз фуқароларни давлат ҳисобидан малакали касб-ҳунарга ўқитиш, оилавий тадбиркорликни ривожлантириш, эҳтиёжманд аҳолини манзилли қўллаб-қувватлаш орқали, 2026 йилгача камбағалликни 2 баробарга қисқартириш кўзда тутилганини маълум қилган.
Таъкидланишича, ижтимоий ҳимоя соҳасида бошқарув тизими ислоҳ қилиниб, ижтимоий хизматларнинг сифати яхшиланади ва кўлами кенгайтирилади. «Энг муҳим масалалардан бири сифатида уй-жой масаласини ҳал этиш, аҳолига қулай яшаш шароитларини яратиш доимий эътиборимиз марказида бўлади. Ушбу йўналишда қабул қилган дастурларимиз, жумладан, арзон уй-жойлар дастури асосида сўнгги беш йилда 140 мингдан зиёд янги квартира ва якка тартибдаги уй-жойлар барпо этилди», — дейди давлат раҳбари.
Қайд этилишича, бу олдинги беш йилга нисбатан 10 баробар кўп уй-жой қурилди, дегани. Шунингдек, келгусида ҳудудларда 1 миллиондан ортиқ аҳоли учун барча қулайлик ва ижтимоий инфратузилмага эга бўлган «Янги Ўзбекистон» массивларини бунёд этилади.
Давлат раҳбарининг таъкидлашича, мамлакатдаги фермер ва деҳқонлар даромадини 2 баробар кўпайтириш учун зарур шароитларни яратилади, қишлоқ хўжалигининг йиллик ўсиш суръатини камида 5 фоизга етказилади.
Эслатиб ўтамиз, 2021 йилнинг мартида Шавкат Мирзиёев Ўзбекистонда 2017—2020 йилларда давлат дастурлари асосида 140 мингта ёки йилига ўртача 35 мингтадан уй-жойлар барпо этилгани, бу авваллари йилига қурилган ўртача уй-жойдан 5-6 баравар кўпроқни ташкил этишини маълум қилганди. Ўшанда Президент 2021 йилда 54 минг оилани уй-жой билан таъминлаш зарурлигини таъкидлаган эди.
Изоҳ (0)