Олий Мажлис Сенатининг янги биносида Президентликка сайланган Шавкат Мирзиёевнинг инаугурация маросими бўлиб ўтмоқда. Президент сифатида қасамёд қабул қилган Шавкат Мирзиёев бугунги кунда инсоният кўплаб муаммоларга дуч келаётгани ва уларга ечим топиш ниҳоятда долзарб бўлиб қолаётганига тўхталиб ўтди, деб хабар беради «Дарё» мухбири.
Биз глобаллашув ҳар томонлама авж олаётган, шиддатли ўзгаришлар содир бўлаётган мураккаб замонда яшамоқдамиз. Бугунги кунда иқлим ўзгаришлари, экологик муаммолар, радикализм, экстремизм ва терроризм, одам савдоси, наркотрафик каби таҳдидлар бизнинг мамлакатимизда ҳам ечилиши зарур бўлган долзарб вазифалар ҳисобланади.Эслатиб ўтамиз, Сирдарёда 4 ноябрь куни бошланган чанг бўрони кечга бориб Тошкентга ҳам етиб келди. Чанг туфайли атрофни кўриш даражаси чекланди. Автомобиллар ҳаракати секинлашди. Кейинроқ «Ўзгидромет»нинг бунинг оқибатида ҳаводаги чанг миқдори белгиланган меъёрдан 5 баробарга ошганини билдирди. Нафас олишда муаммолар юзага келган пойтахт аҳолиси тиббиёт муассасаларига мурожаат қилишни бошлади, 5 ноябрь куни эса Соғлиқни сақлаш вазирлиги фуқароларга чанг бўронида нималар қилиш бўйича тавсиялар берди.Бундай муаммоларни ҳал этишда куч ва имкониятларни бирлаштириш, бу борадаги барча саъй-ҳаракатларни уйғунлаштириш лозим. Бу эса ўз навбатида, келажагимиз қиёфасини белгилайдиган глобал муаммоларнинг миллий ва минтақавий даражадаги ечимларини топиш зарурлигини англатади.
Юртимизда экологик таҳдидларнинг салбий таъсири ортиб бормоқда. Буни куни кеча содир бўлган қум бўронлари ҳам яна бир бор тасдиқлади. Орол денгизининг қуриши билан боғлиқ вазият тобора кескин тус олмоқда.
Шу борада биз Оролбўйини экологик инновациялар ва технологиялар ҳудуди сифатида эълон қилиш бўйича БМТ Бош Ассамблеясининг резолюциясини ҳаётга татбиқ этишга доир тизимли ва комплекс чора-тадбирларни амалга оширишимиз лозим.
Шунингдек, БМТнинг янги экологик сиёсати асосларини ташкил этишга қаратилган Бутунжаҳон экология хартиясини ишлаб чиқиш борасидаги фаолиятимизни жадаллаштириш керак.
Шу йил август ойида мамлакатимизда бўлиб ўтган «Марказий ва Жанубий Осиё: минтақавий ўзаро боғлиқлик. Таҳдидлар ва имкониятлар» мавзусидаги конференцияда қабул қилинган қарор ва ҳужжатларнинг изчил бажарилиши учун халқаро ҳамкорларимиз билан зарур чора-тадбирларни амалга оширамиз.
Шавкат Мирзиёев, Ўзбекистон Президенти
Изоҳ (0)