«Менга сохта ва баландпарвоз гапларнинг кераги йўқ». Шавкат Мирзиёев яна бир бор ўз позициясини эслатиб ўтди

Айни вақтда Олий Мажлис Сенатининг янги биносида Президентликка сайланган Шавкат Мирзиёевнинг инаугурация маросими бўлиб ўтмоқда. Президент сифатида қасамёд қабул қилган Шавкат Мирзиёев ўз нутқида қуруқ ва ёлғон гаплар, таги пуч рақамлар зиён келтириши ҳақида гапирди, деб хабар беради «Дарё» мухбири.

Шавкат Мирзиёев келгуси беш йил учун устувор йўналишларни белгилаш асносида, ўтган даврда эришилган ютуқлар билан бирга, йўл қўйилган хато ва камчиликларни ҳам танқидий нуқтаи назардан чуқур таҳлил қилиш лозимлигини таъкидлаган.

Нега деганда, ўз келажагини ўз қўли, ўз кучи билан яратишга бел боғлаган халқ ва миллат кечаги кундан тўғри сабоқ чиқариб, олдинга интилиб яшайди. Сайловолди учрашувларида мамлакатимиздаги ҳар бир шаҳар ва туманни ижтимоий-иқтисодий, маданий ва маърифий ривожлантириш бўйича янги режалар туздик.

Ҳозирги кунда ана шу таклифларни умумлаштириб, Қорақалпоғистон Республикаси, вилоятлар ва Тошкент шаҳри бўйича алоҳида-алоҳида дастурларни ишлаб чиқмоқдамиз ва уларни йиллар кесимида амалга оширамиз.

Мен бундан беш йил олдин, яъни Президентлик фаолиятимни бошлаган илк кунларда айтган фикримни яна такрорлайман: менга сохта ва баландпарвоз гапларнинг кераги йўқ. Қуруқ ва ёлғон гаплар, таги пуч рақамлар – бу фақат ўзимизни алдаш бўлади. Бу фақат ишимизга зиён етказади.

Биз учун умумий ишимиз ва ҳаракатимизга фойда берадиган ғоя ва фикрлар, амалий таклиф ва ташаббуслар, аниқ натижалар керак. Бундан бошқа йўлни мен мутлақо қабул қилмайман.

Шавкат Мирзиёев, Ўзбекистон Президенти

Аввалроқ Президент сифатида қасамёд қабул қилган Шавкат Мирзиёев ўз нутқида президент сайловидаги рақибларига миннатдорлик билдиргани тўғрисида хабар берилганди.