Қашқадарё вилояти Чироқчи туманида Nexia’га ўрнатилган газ баллони портлаб кетди, деб хабар беради вилояти ФВБ ахборот хизмати.
Маълум қилинишича, 4 ноябрь куни соат 21:00 ларда Чироқчи тумани «Аннарўз» маҳалласидан ўтувчи автомобиль йўлида 29 ёшли Х.Н. бошқарувида бўлган Nexia’нинг газ баллони портлаб кетган.
Ҳодиса оқибатида ҳалок бўлиш ҳолатлари қайд этилмаган. Бироқ ҳайдовчи ва машина ичида бўлган 1973 йилда туғилган йўловчи тан жароҳатлари билан шифохонага ётқизилган. ИИВ ЙҲХББ ахборот хизмати эса мазкур кўнгилсиз ҳодиса оқибатида ҳеч кимга жароҳат етмаганини ёзди. Шунингдек, газ баллонининг портлаш вақтида фарқ бор — идора маълумотига кўра, портлаш соат 19:55 да содир бўлган.
Ҳозирда ҳолат бўйича Чироқчи туман прокуратураси томонидан суриштирув ишлари олиб борилмоқда.
Эслатиб ўтамиз, 27 октябрь куни Чироқчи туманида Nexia’га ўрнатилган газ баллони, 29 сентябрда эса Ғузорда ҳаракатланаётган Lacetti’нинг газ баллони портлаб кетганди.
Изоҳ (0)