2 ноябрь куни Самарқанд аэропорти томонларда «снос»га тушган ҳудудда олиб борилаётган қазиш ишлари пайтида тупроқ остидан қадимий қабр тошлари топилгани ҳақида хабарлар тарқалди. Маданий мерос агентлиги жойига чиқиб, вазиятни ўрганган Самарқанд вилояти маданий мерос бошқармаси мутахассисларининг шу масала юзасидан дастлабки хулосаларини эълон қилди.
Хабарга кўра, Самарқанд халқаро аэропорти МЧЖ ходимлари маълумоти асосида аэропорт ҳудудини реконструкция қилиш жараёнида олдинги дала ҳовлилар ўрнида аниқланган қабр тошлар Самарқанд археология институти ва СамДУ Тарих факультети ходимлари томонидан бориб ўрганилди.
Ўрганиш жараёнида ўлчами 154х50х34 сантиметрли сандиқ шаклидаги қабртош оқ мармардан ишлангани, тошнинг усти ва ён томонларида «Бақара» сурасининг 254-, 256-оятлари туширилгани маълум бўлди. Қабртошнинг айрим қисмлари яхши сақламаганлиги шахснинг дафн этилган вақти ва тўлиқ исм-шарифи ҳақида маълумот олиш жараёнини мураккаблаштирмоқда. Дастлабки кўздан кечириш натижасида унда «Оқила биби» деган ёзув ёзилганлиги аниқланди.
Иккинчи қабртош ҳам сандиқ шаклида бўлиб, қора мармар тошдан ишланган, унда ҳижрий 1049 (1659) йил санаси битилган, ўлчами 116х37х25 сантиметр. Қабртош соҳибининг исми ёзилган томонига шикаст етганлиги сабабли ҳозирча бу борада маълумот мавжуд эмас. Айни вақтда тадқиқот ишлари давом этмоқда.
«Қабртошлар Самарқанд халқаро аэропорти томонидан Самарқанд ўлкашунослик музейига олиб келинди, тадқиқот ишлари давом этмоқда. Маданий мерос агентлиги томонидан ўрганишлар якуни бўйича батафсил маълумот берилишини маълум қиламиз», — дейилади агентлик хабарида.
Изоҳ (0)