Британия бош вазири иқлим ўзгаришига қарши курашда инсоният олдида узоқ йўл турганини айтди

Буюк Британия бош вазири Борис Жонсон иқлим бўйича COP26 конференциясида иқлим муаммоларини ҳал қилиш узоқ вақт талаб қилишини айтди.

«Ҳали олдинда узоқ йўл бор», — дея бош вазирнинг сўзларидан иқтибос келтирди Ғарб ОАВлари.

Жонсон иқлим ўзгаришига қарши курашни футбол ўйинига қиёслади ва бу ўйинда инсоният 5:1 ҳисобида мағлуб бўлаётганини таъкидлади. Шу билан бирга, бош вазир конференцияда эришилиши мумкин бўлган иқлим келишуви бўйича «некбинликни сақлаб тургани»ни билдирди. Жонсоннинг таъкидлашича, Ердаги иқлим ўзгаришига қарши тура олмаслик иқтисодий ҳалокат таҳдидини келтириб чиқаради.

Бош вазир, шунингдек, Япония ривожланган мамлакатлар томонидан ташкил этилган 100 миллиард долларлик жамғармага яна 10 миллиард доллар ажратишга ваъда берганини эслатиб ўтди. Бу жамғарма келгуси беш йил ичида қашшоқ мамлакатларда иқлим ўзгаришини юмшатиш чораларини молиялаштиришга қаратилган.

COP26 иқлим саммитининг очилишида Британия бош вазири жаҳон ҳамжамиятининг аҳволини Жеймс Бонднинг хатарга тўла вазияти билан қиёслади. Унинг сўзларига кўра, агар глобал ҳарорат Цельсий бўйича яна икки даражага кўтарилса, юз минглаб одамларга озиқ-овқат етказиб бериш тизими ишдан чиқиши мумкин; Жонсон «зудлик билан ҳаракат қилиш кераклиги», акс ҳолда жуда кеч бўлишини айтди.

COP26 Буюк Британиянинг Глазго шаҳрида 31 октябрда бошланган ва 12 ноябргача давом этади. Унда 200 га яқин давлатдан вакиллар иштирок этиши кутилмоқда. Иқлим бўйича саммит доирасида дастлаб дунёнинг 100 дан ортиқ етакчилари 2030 йилга бориб ўрмонларнинг йўқолиб кетиши жараёнини тўхтатишга келишиб олди.

Эслатиб ўтамиз, иқлим бўйича саммит бошланишидан бир неча кун олдин Глазго шаҳрида кучли ёмғир ёғиб, кўчаларни сув босган эди.