Britaniya bosh vaziri iqlim o‘zgarishiga qarshi kurashda insoniyat oldida uzoq yo‘l turganini aytdi

Buyuk Britaniya bosh vaziri Boris Jonson iqlim bo‘yicha COP26 konferensiyasida iqlim muammolarini hal qilish uzoq vaqt talab qilishini aytdi.

“Hali oldinda uzoq yo‘l bor”, — deya bosh vazirning so‘zlaridan iqtibos keltirdi G‘arb OAVlari.

Jonson iqlim o‘zgarishiga qarshi kurashni futbol o‘yiniga qiyosladi va bu o‘yinda insoniyat 5:1 hisobida mag‘lub bo‘layotganini ta’kidladi. Shu bilan birga, bosh vazir konferensiyada erishilishi mumkin bo‘lgan iqlim kelishuvi bo‘yicha “nekbinlikni saqlab turgani”ni bildirdi. Jonsonning ta’kidlashicha, Yerdagi iqlim o‘zgarishiga qarshi tura olmaslik iqtisodiy halokat tahdidini keltirib chiqaradi.

Bosh vazir, shuningdek, Yaponiya rivojlangan mamlakatlar tomonidan tashkil etilgan 100 milliard dollarlik jamg‘armaga yana 10 milliard dollar ajratishga va’da berganini eslatib o‘tdi. Bu jamg‘arma kelgusi besh yil ichida qashshoq mamlakatlarda iqlim o‘zgarishini yumshatish choralarini moliyalashtirishga qaratilgan.

COP26 iqlim sammitining ochilishida Britaniya bosh vaziri jahon hamjamiyatining ahvolini Jeyms Bondning xatarga to‘la vaziyati bilan qiyosladi. Uning so‘zlariga ko‘ra, agar global harorat Selsiy bo‘yicha yana ikki darajaga ko‘tarilsa, yuz minglab odamlarga oziq-ovqat yetkazib berish tizimi ishdan chiqishi mumkin; Jonson “zudlik bilan harakat qilish kerakligi”, aks holda juda kech bo‘lishini aytdi.

COP26 Buyuk Britaniyaning Glazgo shahrida 31-oktabrda boshlangan va 12 noyabrgacha davom etadi. Unda 200 ga yaqin davlatdan vakillar ishtirok etishi kutilmoqda. Iqlim bo‘yicha sammit doirasida dastlab dunyoning 100 dan ortiq yetakchilari 2030-yilga borib o‘rmonlarning yo‘qolib ketishi jarayonini to‘xtatishga kelishib oldi.

Eslatib o‘tamiz, iqlim bo‘yicha sammit boshlanishidan bir necha kun oldin Glazgo shahrida kuchli yomg‘ir yog‘ib, ko‘chalarni suv bosgan edi.