Жиноят ишлари бўйича Хатирчи туман судида Навоий кон-металлургия комбинати конидан рудаларни олишда ишлатиладиган портловчи моддалар савдоси билан шуғулланган шахсларга ҳукм ўқилди. Бу ҳақда MY5 телеканалининг «Марказий студия» дастурида маълум қилинди.
Маълум қилинишича, НКМК давлат корхонаси Жанубий кон бошқармасига қарашли «Зармитан» конида рудаларни олиш учун лаҳмларни портлатиш вазифасини бажарган икки фуқаро портловчи моддаларни белгиланган жойларда портлатмасдан, яшириб келган. Улар Самарқанд вилоятидаги икки фуқаро билан тил бириктириб, портловчи моддалар савдоси билан шуғулланган вақтида ДХХ тезкор гуруҳи томонидан ашёвий далиллар билан қўлга олинган.
Ўтказилган тергов ва суриштирув ишларидан сўнг, ушбу фуқароларга нисбатан суд ҳукми ўқилган.
Судланувчиларга нисбатан Жиноят кодексининг 248, 213 ва 59-моддаларининг (ўқотар қурол ёки ўқ-дориларни бепарволик билан сақлаш, давлат органининг, давлат иштирокидаги ташкилотнинг ёки фуқаролар ўзини ўзи бошқариш органининг хизматчисини пора эвазига оғдириб олиш) тегишли бандлари асосида бир нафарига 11 йил, қолган шерикларига нисбатан эса 10 йил ва 10 йил-у 6 ой муддатга озодликдан маҳрум этиш жазоси тайинланган. Шунингдек, «Зармитан» кони ер ости портловчи моддалар омборхонасида сақланаётган 83 дона портлатиш моддалари тегишли тартибда йўқ қилиниши белгиланган.
Эслатиб ўтамиз, 2019 йилда «Зармитан» тилла конидан портловчи моддаларни олиб чиқиб кетишга уринган фуқарога 3 йил НКМК ДКга қарашли конларда портлатувчи вазифасида ишлаш ҳуқуқидан маҳрум қилинган ва 5 йилга озодликдан чеклаш жазосига тайинланган эди.
Изоҳ (0)