1 ноябрь куни Президент Шавкат Мирзиёев ҳузурида 2022 йил учун солиқ тушумлари ҳамда бюджет параметрлари юзасидан йиғилиш ўтказилгани тўғрисида хабар берилганди. Давлат раҳбари йиғилиш давомида 2022 йилда мўлжалланган давлат бюджети лойиҳасида таълим ва тиббиёт тизимига 58 триллион сўм ажратилиши кўзда тутилганини билдирди, деб хабар беради «Gazeta.uz».
«Таълим ва тиббиёт тизимига ҳеч қачон бундай пул бермаганмиз. Шу нарсани халқимиз билиши керак», — дейди Президент «Ўзбекистон 24» телеканали томонидан эфирга узатилган лавҳада.
Шавкат Мирзиёевнинг сўзларига кўра, бепул даволаниш ордерига 600 миллиард сўм ажратилади: «Бу ҳам янгилик бизнинг тизимимизда. Касални ўзига пул берамиз. Битта касаллик учун 50 минг ёки 40 минг сўм сизнинг ихтиёрингизда. ‘Хоҳласангиз тиббиётни давлатникига, хоҳласангиз хусусийга боринг’, деймиз. Сал бўлса ҳам шунда давлат идоралари тиббиётининг дунёқараши ўзгаради, деган фикрдаман», — дейди Президент.
Давлат раҳбари ўқитувчи ва шифокорларнинг маошлари босқичма-босқич оширилишини таъкидлаб, бу учун 2022 йилда 350 миллиард сўм ажратилишини айтган. «Энди ҳар бир маҳаллага пул берамиз. 10 100 та маҳаллага айланма маблағ. Ҳар бир йўналиш бўйича йўл харитаси бўлади», — дея қўшимча қилади Шавкат Мирзиёев.
Аввалроқ Шавкат Мирзиёев фарғоналик сайловчилар билан учрашув чоғида ўқитувчиларнинг маошини 1000 долларга етказмагунча тўхтамаслигини маълум қилган эди. Шунингдек, у тиббиётда янгича тартиб йўлга қўйилишини билдирганди.«Халқимиз содда, шифокор давлат томонидан ажратилган ўнта доридан учтасини берса ҳам рози бўлиб кетаверади. Энди янгича тартиб жорий қиламиз — пулни шифохонага эмас, беморга берамиз», — деган эди Шавкат Мирзиёев.
2020 йилнинг ноябрида ўқитувчилар ва шифокорлар билан учрашувда Президент уларнинг маошини ошириш бўйича катта режалар ҳақида эълон қилган эди. «Ўқитувчи 1000 доллар олмаса, ишга келмаслиги керак. Худди шу ҳолат шифокор билан. Агар шифокор 1000 доллар олмаса, эртага болалари ва невараларини қандай боқади?» — деган эди Президент. Ўшанда Шавкат Мирзиёев кўпчилик мамлакатдаги тиббий хизматлар сифатидан норози эканини танқид қилганди.
Изоҳ (0)