Суданда парламент сайловларини ўтказиш учун 1,5 йил етарли. Бу ҳақда мамлакат ҳарбий етакчиси, Қуролли Кучлар бош қўмондони Абдул Фаттоҳ ал-Бурҳонга таяниб, «РИА Новости» хабар берди.
Эслатиб ўтамиз, Судан ҳарбийлари 25 октябрга ўтар кечаси мамлакат муваққат ҳукуматининг бир қатор вазирларини, жумладан, муваққат бош вазир Абдулла Хамдокни ҳибсга олганди. Ўтиш даврида Суверен кенгаш раҳбари Абдул Фаттоҳ ал-Бурҳон халққа телемурожаат орқали фавқулодда ҳолат жорий этилиши ва мамлакат ҳукуматининг тарқатиб юборилишини маълум қилди. 26 октябрь куни Хамдок ва унинг рафиқаси пойтахтдаги қароргоҳга қайтгани маълум бўлди.
Ал-Бурҳон 25 октябрь куни мамлакатдаги сайловлар 2023 йилга режалаштирилганини эълон қилганди. Унинг сўзларига кўра, дастлаб сайловлар 2022 йилнинг апрелида ўтказилиши керак бўлган, бироқ Жубада эришилган тинчлик битимидан сўнг, муддат кўплаб томонлар билан келишган ҳолда бир йилга узайтирилган.
«Сайловларга белгиланган (тайёргарлик) муддат якунланишга яқинлашаётгани сабаб кўплаб томонлар, жумладан, UNITAMS билан (БМТнинг Судандаги ўтиш даврини қўллаб-қувватлаш борасидаги миссияси — таҳр.) консультациялар ўтказдик, уларнинг барчаси сайловларга тайёргарлик кўриш учун 1,5 йил етишини маълум қилди. Сиёсий кучлар сайловларга қизиқиши керак, 1,5 йил уларга етмайди деб ўйламайман», — дея маълум қилади ал-Бурҳон.
«Биз барчага, Судан ва суданликларга ёрдам ҳамда қўллаб-қувватлов кўрсатишни истаганларга уларнинг ёрдамини мамнуният билан қабул қилишимизни айтяпмиз… Судан давлати ва халқини қўллаб-қувватлаш учун олиб келинадиган маблағларни, шубҳасиз, сўраймиз», — дейди у.
Аввалроқ АҚШ, Германия ва Жаҳон банки ҳарбийлар фуқаролик ҳукуматини ҳокимиятга қайтармагунча иқтисодий ёрдам кўрсатишни тўхтатишини маълум қилганди.
Изоҳ (0)